भांगरभूंय | प्रतिनिधी
फोंडें: फोंडेंच्या कदंबा बस स्टॅण्डाचें काम कांसवा गतीन सुरू आसा. बस स्टॅण्डाचे दुरुस्तीक लागून प्रवाशांक रस्त्याचे कुशीक उबे रावून बशीची वाट पळोवची पडटा बसस्टॅण्ड वाठारांतल्या रस्त्यांचेर व्हड व्हड फोंडकुलां पडिल्ल्यान प्रवाशांची गैरसोय जाता. बसस्टॅण्डाची दुरुस्ती ताकतिकेन पुराय करची, अशी मागणी प्रवाशांनी केल्या.
आवतिकाय जाल्लो कदंबा बसस्टॅण्ड फेब्रुवारी 2022 सावन प्रवाशां खातीर बंद दवरला. ते उपरांत रोखडेंच ताचें दुरुस्तीकाम हातांत घेतिल्लें. पुराय पावसाळ्यांत प्रवाशांत बसस्टॅण्डा भायर पावसांत उबे रावपाचो वेळ आयल्लो. बसस्टॅणाचें दुरुस्तीकाम अजून लेगीत चालू आशिल्यान प्रवाशांत आतां क़कडीत वतांत उबे रावचें पडटा. हें दुरुस्तीकाम पुराय जावपाक आनीक कांय म्हयने लागपाची शक्यताय आसा.
बसस्टॅण्ड वाठारांतल्या रस्त्याचेर फोंडकुलां पडिल्ल्यान बस चालकां सयत प्रवाशांकूय धपक्यांचो त्रास सोंसचो पडटा. बसस्टॅण्डा वयल्या वाठारांतल्या रस्त्यांची दुरुस्ती करपाची खर गरज आसा. ह्या वाठारांत येरादारी खात्याचें कार्यालय आशिल्ल्यान सद्दां थंय लोक आपापल्या कामां खातीर येतात. प्रवाशी बशी आनी हेर वाहनांची येरादारी वाडिल्ल्यान रस्त्याची दुरुस्ती ताकतिकेन करपाची गरज आसा. हेर राज्यांनी वचपी प्रवाशी फोंडेंच्या कदंबा बसस्टॅण्डाचेर येतात. हेर कदंबा बसस्टॅण्डा लागसार मेळपी सुविधा फोंडेंच्या कदंबा बसस्टॅण्डाचेर मेळना, अश्योय प्रवाशांच्यो कागाळी आसात. कदंबा बसस्टॅण्डाच्या वाठारांत खूबशो बंद स्थितींतल्यो बशी कितल्याशाच म्हयन्यां सावन पार्क केल्ल्यो आसात. तातूंत कांय खाजगी कंपनींतल्या कामगारां खातीर दवरिल्ल्या बशींचो आसपाव आसा. बंद स्थितींतल्यो बशी थंयच्यो काडून ती सुवात मेकळी करची, अशी मागणी खूबश्या बस चालकांची आसा.
गरजेच्यो सुविधा दिवपाची प्रवाशांची मागणी
फोंडें म्हालांतलो म्हत्वाचो आशिल्ल्या कदंबा बसस्टॅण्डाचें दुरुस्तीकाम ताकतिकेन पुराय करपाची गरज आसा. ह्या बसस्टॅण्डाचेर दिसपट्टे कितलेशेच प्रवाशी येतात- वतात. हेर राज्यांतल्यान येवपी बशी लेगीत ह्या बसस्टॅण्डाचेर येतात. ह्या बसस्टॅण्डाचेर गरजेच्यो सुविधा दिवपाची मागणी प्रवाशांनी केल्या. सध्या दुरुस्तीकाम चालू आशिल्ल्यान सगळ्याच प्रवाशांत भायर वतांत उबे रावचें पडटा. कदंबा म्हामंडळान प्रवाशांची गैरसोय पयस करचे खातीर ताकतिकेन कदंबा बसस्टॅण्डाचें दुरुस्तीकाम पुराय करपाची गरज आसा, अशें सुरेंद्र नायक ह्या प्रवाशान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
