भांगरभूंय | प्रतिनिधी
सपना मापारीः मदले सुटयेंतल्या खाणाचे दरवाडी खातीर मुख्यमंत्र्यांक परबीं
भांगरभूंय । प्रतिनिधी
दिवचलः मदले सुटयेंतल्या खाणाच्या आदल्या दरांत वाड करून ती आठा वयल्यान 10 रुपया केल्या. हे वाडीक लागून मुख्यमंत्र्यांचे स्वयंपूर्ण आनी आत्मनिर्भर येवजणेक अदीक चालना मेळटली, अशें सपना मापारी हांणी सांगलें.
मदले सुटयेंतलें खाण येवजणे खाला वावर करपी उत्तर गोंयांतल्या महिला आपवावुरपी गटां वतीन मुख्यमंत्री डॉ. प्रमोद सावंत हांणी मदले सुटयेंतलें खाण दर वाडयिल्ल्यान तांकां जाहीर परबीं दिवचे खातीर आपवावुरपी गटांनी पत्रकार परिशद घेतिल्ली. त्या वेळार मापारी उलयताली.
दोन वर्सां कोरोमा म्हामारीक लागून मदले सुटयेंतलें खाण येवजण बंद आशिल्ली. हे मजगतीं कडधान्य आनी हेर वस्तूंचें मोल वाडिल्ल्यान आदले दर परवडानाशिल्लें. हे संबंदांत महिला गटांनी फाटपुरवण करून मुख्यमंत्र्यां कडेन भुमिका मांडिल्ली. ते उपरांत डॉ. सावंत हांणी दर वाडीक मान्यताय दिल्ल्यान थाका मेळ्ळ्या, अशी म्हायती विद्या परब, सपना मापारी, प्रतिमा काणेकार, शर्मिला पळ, केसरी नायक, निलम नायक, लक्ष्मी गांवस, सुनिता सावंत, रुपाली घाडी, भावना मांद्रेंकार आनी महिला गटांच्या हेर वांगड्यांनी पत्रकार परिशदेंत दिली. आयज खूबश्यो बायलो मदले सुटयेंतले खाण दितात. दर वाडीक लागून तांकां निश्चीत थाकाय मेळ्ळ्या. मुख्यमंत्री सेगीत सकारात्मक विचार करून स्वयंपूर्ण गोंया खातीर विवीध येवजण्यो चालीक लायतात. तांकां ह्या मळाचेर आनी राज्याचे उदरगतींत व्हड येस मेळचें, अशेंय ह्या वेळार महिला गटाच्या वांगड्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
