भांगरभूंय | प्रतिनिधी
मनीस हो मुळांतूच हांवरो. चडांत चड पयसो कसो मेळटलो हाचेर तो चड भर दितना दिसता. कांय लोक मेहनत करीनासतना शाॅर्ट कट मार्गान आयतो पयसो मेळोवपाचो यत्न करतात. हातूंतलो एक मार्ग म्हणल्यार भ्रश्टाचार. अर्थांत तो चुकीचो, बेकायदेशीर…. आनी हो भ्रश्टाचार देशाच्या खाची कोनशांनी पातळ्ळा. खास करून सरकारी यंत्रणे भितर तो हेर कडले परस चड आसा. खुद्द गोंय सरकारान हालींच, भ्रश्टाचार हो फक्त पयशांचोच न्हय, तर फायल स- सात म्हयने आडोवन दवरप हो पसून एके तरेचो भ्रश्टाचार अशें म्हणलां. सरकारी यंत्रणेंत भ्रश्टाचार ना, त्यो फक्त वावड्यो अशें म्हणपाचें धाडस पिसो मनीस पसून करचो ना. हाचे आदीं खोटल्यांनी आरोप जाल्यात, कांय प्रकरणां उक्ताडार पसून आयल्यांत. कांय जाणाचेर आयकर धाडी पडल्यात. आरोप केल्ल्या फुडाऱ्यांनी आरोप जाल्ल्या फुडाऱ्यांक आपल्या पक्षांत घेतल्यात. पूण, उपरांत ह्या प्रकरणाचें कांय जावंक ना. कारण गोंयचे लोक सोशीक. व्हड मनाचे. ते रोखडेच दुबावीतांक भोगशितात. घुंवळे वखदां तस्करीचो आरोप जाल्ल्यां मदीं एकाच नांवाचे दोन- दोन दुबावीत पसून आशिल्ले खंय. गोंयांत भ्रश्टाचारा आड, गैरकारभारा आड कांय विरोधक वा एनजीओ आवाज काडटात. पूण तातूंत तांचोय विशिश्ट हेतू आसता, अशें दुबावीत मनशाचे, पक्षाचे समर्थक म्हणटात. आरोप जाल्लो मनीस पक्ष बदलत वता तसो तो दुबावीत…. नितळ…. परत दुबावीत जाता. इतले आमचे फुडारी लवचीक आनी तांकां मतां दिवपी मतदारूय.
सर्गांत देव आसा आनी धर्तरेर सगलें बरें चल्लां. कितें चुकल्यार देव फुडाऱ्यांक सल्लो पसून दिवपाक फाटीं फुडें पळयनात. म्हणटकच कोणाक भिवपाची गरज ना. फाटलीं पांच वर्सां गोंयांत एकाय केंद्रीय सरकारी कर्मचारी वा राष्ट्रीय बँक अधिकाऱ्या आड कागाळ जावंक ना. हाचो अर्थ गोंयांत रामराज्य चल्लां. ताकाच लागून गोंयांत सीबीआयची खरेंच गरज आसा का ना, हो प्रस्न निर्माण जाता, अशें मत सीबीआयचे गोंयचे अधिक्षक आशिष कुमार हांणी उक्तायलां. फाटल्या 10 म्हयन्यांत फक्त तीन गुन्यांव दाखल जाल्यात, अशेंय तांणी सांगलें. हाचे वयल्यान गोंयकारांक भ्रश्टाचाराचें व्हडलेंशे पडून गेल्लें ना, असो घेवपाचो? काय सरकारी अधिकारी रातयां प्रामाणीक बी जाल्यात? तशें सगलेच अधिकारी भ्रश्टाचारी, कामचुकार नात. नाजाल्यार कारभार सुरळीत चलचो नाशिल्लो.
आशिष कुमार हांणी केंद्रीय सरकारी अधिकारी गोंयांत व्हडल्या प्रकल्पांनी घरां विकत घेवपाक लागल्यात, अशी म्हायती मेळिल्ल्याचें सांगलें. ही गजाल तशी पोरणी. गोंयांत पोस्टींग जालें काय बंगलो घेवपाचे प्रकार 30-40 वर्सां पयलीं सावन सुरू जाल्यात. गोंयांत कोणा कोणाचीं घरां आसात, तीं कोणाच्या नांवार आसात, ताची पंचायतीं कडेन चवकशी केल्यार बरीच म्हायती उक्ताडार येतली. बार्र, पबा प्रमाण दुसऱ्यांच्या नांवार पसून घरां घेतिल्लीं आसतलीं. आशिष कुमार हांणी गोंयकारांक आवाहन केलां. तें म्हणल्यार, कोणूय अधिकारी कितें चुकीचें करता जाल्यार कागाळ करची. ती करपाची ना जाल्यार ताचे विशींची म्हायती आमकां सांगची. आमी फुडली चवकशी करतात!! आतां पळोवपाचें कितले गोंयकार, एनजीओ कागाळी करतात वा म्हायती दितात ते. गोंयच्या पुलिसांक, दक्षता खात्याक सीबीआयन दिल्लें हें उक्तें आव्हान म्हणू येता. आमच्या तपास यंत्रणांनी आशिष कुमार हांचें म्हणणें गंभीरपणान घेवचें आनी थळावे अधिकारी, कर्मचारी भ्रश्टाचार, गैरप्रकार, गैरकारभारांत घुस्पूंक नात मूं, हें पळोवचें. कागाळेची पसून गरज ना. कारण ते आमचे मदलेच एक.
गोंयकार हेर राज्यांच्या नागरिकांचे तुळेन भ्रश्टाचार सोंसून घेतात, अशें कुमार हांणी म्हणलां. आमची सोंशीकसाण सामकी पेजाद. वादळ, वारें आयलें तरी ती मोव पडपाची ना. हांगां दर म्हयन्याक एक अशे भ्रश्टाचाराचे आरोप जाल्ले फुडारी वर्सांचीं वर्सां वेंचून येतात. सामके विरोधी विचारसरणेच्या पक्षांत गेल्यार पसून मतदार तांकां भोवमतान विधानसभेंत धाडटात. ‘जेथें जातो तेथें तूं माझा सांगाती’, हें संत तुकारामबुवान गोंयच्या फुडारी आनी मतदारांक उद्देशूनच बरयलां आसतलें. तें आमी सिद्धूय करून दाखयलां. उमेदवार जंय वता थंय मतदार ताचे सांगाती कशे वतात आनी ताकाच वेंचून हाडटात. तशे राज्य पांवड्या वयले कोण अधिकारी, फुडारी बी चुकीच्या मार्गाचेर चलतात जाल्यार सीबीआयक खबर आसतलेंच. तांणी ती म्हायती पुलिसांक दिवं येता. केंद्र सरकारान आदेश दी म्हणसर वाट पळोवपाक जाय अशें ना! सीबीआय वा आनीक कोणूय कितेंय म्हणू, सगले कडेन भ्रश्टाचार हो शिश्टाचार जाला. तपास यंत्रणांनी तो मुळा सावन हुमटायले बगर आमचो देश महासत्ता जावप कठीण….. आनी हे खातीर लोकांचो वांगड जाय. चलात तर, तपास यंत्रणांचे सांगाती जावया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
