भांगरभूंय | प्रतिनिधी
भांगरभूंय । प्रतिनिधी
पोरणे गोंयः सान्त आंद्रेचो आमदार विरेश बोरकार हांणी बांदकाम खात्याच्या अधिकाऱ्यां वांगडा आगशी, नेवरा आनी मंडुर वाठारांतलया रस्त्यांची पळोवणी केली. चडश्या रस्त्यांची अवतिकाय जाल्ल्यान थंय नवे रस्ते बांदपाची वा आसात ते सारके करपाची सामकी गरज आशिल्ल्यान तांणी ही पळोवणी करून अधिकाऱ्यांक सूचोवण्यो केल्यो.
मंडूरच्या सांकवांची ताकतिकेन दुरुस्ती करपाची गजर आसा अशें ताणे सांगलें. ताच्या वांगडा नेवराची सरपंच सुनिता नायक आनी वॉर्डांतले पंच वांगडी आशिल्ले. आगशी, नेवरा आनी मंडूर पंचायतींक आपणे भेट दिल्ली तेन्ना रस्त्यांचो प्रश्न बांदकाम खात्या कडेन उपस्थित करपाचें उतर आपणे दिल्लें. रस्ते सारके करपाचे नदरेन तांची पळोवणी आपणे केली अशें तांणी पत्रकारांक सांगलें.
रस्त्यांची दुरुस्ती करपा खातीर थारावीक वेळ असो दिल्लो ना. बांदकाम खात्याच्या संपर्कांत रावन काम जाता तितल्या बेगीन करपाचो आपलो यत्न आसतलो अशें तांणी स्पश्ट केलें. बोरकार हांच्या वांगडा आगशीचो सरपंच इमी फर्नांडीस आनी मंडूरचो सरपंच प्रशांत नायक आशिल्लो. नेवरा पंचायत घराचें नूतनीकरण काम पुराय करपाक कळाव जाता हे खातीर आमदारान हुस्को उक्तायलो. गोंय साधन सुविधा उदरगत म्हामंडळाक आपणे काम पुराय करपाक सांगलां अशें तांणी सांगलें. पंचायत घराच्या सभाघराचें काम पुराय करपाक आपणे कंत्राटदाराक सागलां अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
