भांगरभूंय | प्रतिनिधी
भांगरभूंय । प्रतिनिधी
पणजीः पणेजो आमदार आनी मंत्री बाबूश मॉन्सेरात हाचेर लिंगीक अत्याचार केल्ल्याची कागाळ करपी चलयेन न्यायालयांत आपली बाजू मांडपा खातीर तशेंच सरकारी वकिलाक मजत करपा खातीर वकील दिवपाची मागणी एका अर्जा वरवीं केल्या. ह्या लिंगीक अत्याचार प्रकरणाची फुडली सुनावणी 2 डिसेंबराक दवोरल्या.
पिडेस्त चलयेन मॉन्सेरात हाणे घुवळीचे वखद पियेवपाक दिवन आपल्याचेर बलात्कार केल्ल्याचो आरोप 2016 वर्सा केल्लो. ताची दखल घेवन पणजेच्या बायल पुलिसांनी मॉन्सेरात आनी हेर दोगां आड बाल लिंगीक शोशण विरोधी कायद्या खाला गुन्यांव नोंद केल्लो. पणजेच्या उत्तर गोंय जिल्हो आनी सत्र न्यायालयांत 250 पानांचें आरोपपत्र सादर केल्लें. तातूंत 40 साक्षिदारांची नांवा दिल्यात. बाबूश मॉन्सेरात हाकां न्यायालयान सशर्त जामीन मंजूर केल्लो.
3 जून 2019 दिसा न्यायालयान मॉन्सेरात आनी हेर दुबावितां आड आरोप निश्चीत करपाचो आदेश दिल्लो. ताका मॉन्सेरातान मुंबय उच्च न्यायालयाच्या गोंय खंडपिठांत आव्हान दिल्लें. उपरांत तांणी हो अर्ज फाटीं घेतगीर केश सुरू जाल्ली. बिरेस्तारा सुनावणी जाली तेन्ना पिडेस्त चलयेन आपल्याक वकील दिवपाची मागणी करपी अर्ज न्यायालयाक केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
