भांगरभूंय | प्रतिनिधी
धरणें आंदोलनकर्त्यांची मागणी; नांवा वयल्यान राजकारण करपाचो यत्न केल्यार खर आंदोलन
भांगरभूंय । प्रतिनिधी
पेडणें: गोंयचे भाग्यविधाते आनी पेडण्याचे सुपूत जांणी राज्या खातीर शिक्षणीक, समाजीक, सांस्कृतीक, उद्देगीक मळाचेर क्रांती केली, त्या भाऊ सायब बांदोडकार हांचें नांव मोपा आंतरराष्ट्रीय विमानतळाक दिवचें, अशी मागणी मोपा विमानतळ नामकरण समितीच्या धरणें आंदोलनांत मानेस्तांनी केली. जर भाऊसायबांचें नांव ह्या विमानतळाक दिलें ना जाल्यार आनीक कोणाचेंच नांव ताका दिवपाक दिवचे नात, अशी शिटकावणी आंदोलनकर्त्यांनी ह्या वेळार दिली.
पेडणें म्हालांतल्या मोपा विमानतळा खातीर भाऊसायब बांदोडकार हांचें काय मनोहर पर्रीकार हांचें नांव दिवचें हाचेर वयल्यान सध्या वाद चालू आसा. ह्या वादाक पूर्णविराम लावचे खातीर मोपा आंतरराष्ट्रीय विमानतळ नामकरण समितीन 3 नोव्हेंबराक पेडणें उपजिल्होधिकारी कार्यालया मुखार धरणें आंदोलन आयोजीत केल्लें. ह्या वेळार मोपा विमानतळाक फक्त भाऊसायबांचें नांव दिवन हो वाद सासणाचो सोंपोवचो, अशी एकमतान मागणी केली. भाऊसायबां बगर दुसऱ्या कोणाच्याच नांवाचो उच्चार लेगीत करचो न्हय. जर असो यत्न जालो आनी ह्या विमानतळ प्रकल्पाक राजकारणाचो रंग दिवपाचो यत्न केलो जाल्यार खर आंदोलन करपाची शिटकावणी आंदोलनकर्त्यांनी ह्या वेळार दिली.
ह्या वेळार आदले केंद्रीय मंत्री रमाकांत खलप, प्राचार्य सुभाष वेलिंगकार, नामकरण समितीचे निमंत्रीत सुभाष केरकार, शिवसेना राज्य मुखेली जितेश कामत, बोडगेश्वर शेतकार समितीचे अध्यक्ष संजय बर्डे, भोवजन समाजाचे फुडारी उमेश तळवणेंकार, कूळ मुंडकार संघटणेचे अध्यक्ष डॅनियल डिसोझा, झिला उर्फ नारायण मयेंकार, उदय महाले, नारायण गडेकार, आदले शिवसेना अध्यक्ष रमेश नायक, उमेश गाड, दीपेश नायक आनी हेर आंदोलनकर्ते हाजीर आशिल्ले.
भाऊसायब बांदोडकार मैदानाचेर जंय तांची समाधी आसा, तिचो अजीन मेरेन सरकारान विस्तार करूंक ना. तो विस्तार करीन थंय एकादो प्रकल्प आनी भाऊसायबांची पुराय म्हायती, म्हायतीपट, वर्णानात्मक चित्रां अशें तरेचो प्रकल्प उबारून खऱ्या अर्थान भाऊसायबांक आर्गां ओंपचीं, अशी मागणी प्राचार्य वेलिंगकार हांणी केली.
भाऊसायब खऱ्या अर्थान लोकफुडारी आशिल्ले. तांणी दिल्लें योगदान व्हड आसा. मोपा विमानतळाक तांचेंच नांव दिवचें, अशें रमाकांत खलप हांणी सांगलें.
भाऊसायबांच्या नांवांचेर मांद्रें मतदारसंघांतल्यान मगोचे आमदार म्हूण जीत आरोलकार जिखून आयले. पेडणें मतदारसंघाचे आमदार प्रवीण आर्लेकरा हे जरी भाजपांत गेले तरी लेगीत ते मगो मोगीच. सुरवेक तांणी भाऊसायबांच्या नांवाचेरूच आपली लोकप्रियता आनी वळख निर्माण केली. जर तांचो भाऊसायबाच्या नांवाक विरोध आसा जाल्यार तांणी आपल्या कार्यालयांतलो भाऊसायबांचो पुतळो काडून दाखोवचो, अशें आव्हान उमेश तळवणेंकार हांणी दिलें.
डॅनियल डिसोझा हांणी सांगलें, भाऊसायब हे भोवजन समाजाचे फुडारी आनी लोक फुडारी म्हूण वयर सरले. तांणी गोंयकारांच्या काळजांत आपली सुवात निर्माण केल्या. तांचेंच नांव विमानतळाक दिवचें.
शाहू आंबेडकर प्रतिश्ठानाचे महादेव गवंडी हांणी सांगलें, पेडणें म्हालांतल्या दोनूय लोकप्रतिनिधींनी मोपा विमानतळ प्रकल्पा खातीर भाऊसायबांचें नांव दिवपा खातीर यत्न करचे. तशेंच ह्या संबंदांत आपली भुमिका स्पश्ट करची.
भाऊसायबांचें कर्तृत्व आनी दातृत्व आयच्या एकाय राजकरण्याक लागू जायना. भाऊसायबांनी गोंयच्या भोवजन समाजाच्या हिता खातीर वेगवेगळे उपक्रम चालीक लायले. ताकाच लागून भोवजन मानान जियेता. अशा फुडाऱ्याचें नांव मोपा विमानतळाक दिवन हो वाद सासणा खातीर सोंपोवचो, अशें उमेश गाड हांणी सांगलें.
ह्या वेळार संजय बर्जे, दीपेश नायक, विनायक च्यारी, गजानन मांजरेकार आनी हेरांनी विचार मांडले.
आंदोलनकर्त्यांनी ह्या वेळार पेडणें उपजिल्होधिकारी दीपक वायंगणकार हांकां निवेदन सादर करून मोपा विमानतळा खातीर फक्त भाऊसायब बांदोडकार हांचेंच नांव दिवचें, अशी मागणी करपी निवेदन सादर केलें.
फक्त भाऊसायबांचेंच नांव दिवचें: वेलिंगकार
भाऊसायब बांदोडकार हांणी केल्लो वावर ज्या आयच्या राजकारण्यांक समजना तांणी ह्या विशयाचेर उलोवचेंच न्हय. भाऊसायबाचें कर्तृत्व आनी तांणी केल्ल्या वावराची पोचपावती हाचो भोवमान म्हूण मोपा विमानतळाक फक्त आनी फक्त तांचेंच नांव दिवचें, अशी मागणी प्राचार्य सुभाष वेलिंगकार हांणी केली.
दुसऱ्या नांवाचो विचार केल्यार आंदोलनः केरकार
मोपा विमानतळा खातीर भाऊसायब बांदोडकार हांचें नांव दिवचें, हे खातीर फाटल्या तीन म्हयन्यां सावन आंदोलन करतात. विवीध तरेचीं निवेदनां राज्य सरकारा वांगडाच प्रधानमंत्री नरेंद्र मोदी हांकांय दिलीं. मोपा विमानतळा खातीर दुसऱ्याच्या नांवाचो विचार करप, हें निशेध करपा सारकें आसा. भाऊसायबांचें सोडून हेर कोणाचेंय नांव ह्या प्रकल्पाक दिलें जाल्यार पेडणें म्हालांत खर आंदोलन करतले, अशी शिटकावणी सुभाष केरकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
