भारत सेमी फायनलीच्या हुमऱ्यार

भांगरभूंय | प्रतिनिधी

संवसारीक टी-20 क्रिकेट सर्तींत काल जाल्ले उमळशीक वाडोवपी मॅचींत भारतान खतरनाक बांगलादेशाक 5 धांवड्यांनी हारयलो. ह्या जैता सयत भारत सेमी फायनलींत सुवात मेळोवपाक सामको लागीं पावला.

बांगलादेशाचो मुखेली शाकिब अल हसनान टॉस जिखून भारताक पयलीं बॅटींग करपाचें आमंत्रण दिलें. लोकेश राहुल आनी विराट कोहली हांच्या अर्द शेंकड्यांच्या आनी सुर्यकुमार यादवाच्या जलद खेळी नेटार भारतान निर्धारीत 20 ओव्हरींनी 6 विकेटी वगडावन 184 धांवड्यो केल्यो.

प्रत्युत्तर दितना बांगलादेशाचो ओपनर लिटन दासान जबरदस्त सुरवात केली. पावस सुरू जावचे पयलीं बांगलादेशान 7 ओव्हरींनी 66 धांवड्यो केल्ल्यो. तशेंच ताची एकूय विकेट पडूंक नाशिल्ली. पावस थांबल्या उपरांत मॅचीक परतून सुरवात जाली. त्या वेळार डकवर्थ-लुईस नेमा प्रमाण बांगलादेशाक 16 ओव्हरींनी 151 धांवड्यांची सुदारीत मोख मेळ्ळी. हांगाच्या भारतान मॅच घुंवडायली आनी जैत जोडलें. बांगलादेशान 16 ओव्हरींनी 6 विकेटी वगडावन 145 धांवड्यो केल्यो. भारता वतीन हार्दिक पांड्यान आनी अर्शदीप सिंगान 2-2 विकेटी घेतल्यो.

पावस थांबल्या उपरांत मॅच परतून सुरू जाली आनी राहुलान भारताक धोक्याचो थारपी लिटन दासाक 60 धांवड्यांचेर धांवबाद केलो. लिटन दास बाद जाल्या उपरांत मोहम्मद शमीन दुसरो ओपनर नजमूल हुसैने शांतोक 21 धांवड्यांचेर बाद करीत बांगलादेशाक दुसरो धपको दिलो. दोनूय ओपनर तंबूंत परतून गेल्या उपरांत मुखेली शाकिर अल हसनान सगली जापसालदारीक आपल्या भुजाचेर घेत मॅच 30 बॉलांनी 54 धांवड्यो अशी हाडली.

ते उपरांत अर्शदीपान अफिफ हुसैनाक तीन धांवड्यांचेर बाद करीत बांगलादेशाक तिसरो धपको दिलो. हेच ओव्हरींत अर्शदीपान मुखेली शाकिबाक 13 धांवड्यांचेर बाद करून बांगलादेशाक खर धपको दिलो. ताच्या फाटोफाट हार्दिक पांड्यान चौधरीक बाद करून बांगलादेशाचो पांचव्या बॅट्समनांक तंबूंत धाडलो. ताणें हेच ओव्हरींत मोसादाक बाद करीत मॅच 18 बॉलांनी 43 धांवड्यो अशी केली.

अर्शदीपान 14वे ओव्हरींत 12 धांवड्यो दिल्ल्यान मॅच 12 बॉलांनी 31 धांवड्यो अशी जाली. 15वी घालपाक पांड्या आयलो. हे ओव्हरींत बांगलादेशान एक सको आनी एक चवक्याच्या नेटार 10 धांवड्यो केल्यो.

अखेरचे ओव्हरींत बांगलादेशाक 20 धांवड्यांची गरज आशिल्ली. रोहित शर्मान ही ओव्हर घालपाक अर्शदीपाक आपलयो. ताणें पयल्या बॉलाचेर एक धांवडी दिली. दुसऱ्या बॉलाचेर सोहान सको मारलो. अशे तरेन चार बॉलांनी 13 धांवड्यांची गरज पडली. तिसऱ्या बॉलाचेर एकूय धांवडी येवंक ना. चवथ्या बॉलाचेर दोन धांवड्यो आयल्यो. निमाण्या दोन बॉलांचेर 11 धांवड्यांची गरज आशिल्ली. पांचव्या बॉलाचेर चवको मारिल्ल्यान निमाण्या बॉलाचेर बांगलादेशाक जैता खातीर सात धांवड्यांची गरज आशिल्ली. निमाण्या बॉलाचेर एक धांवडी दीत अर्शदीपान मॅच जिखून दिली.