मोपांतल्यान पळोवया सपनां गोंय म्हान जावपाचीं

भांगरभूंय | प्रतिनिधी

नव्या विमानतळा वांगडा नवीं सपनां तरणाट्यां मदीं फुलतलींच, पूण प्रादेशिकताय राखून राज्याची प्रतिमा इबाडटल्यांक समज दिवपाची जापसालदारकीय…..

गोंयचें नांव व्हड करून ल्हान जाले म्हान
बंदखणीचीं देवळां जालीं लामणदिवे प्राण…
गोंयच्या 2016 -17 वर्साच्या अर्थसंकल्पांतल्यो ह्यो वळी बाकीबाबांच्या  कवितेंतल्यो. अर्थसंकल्पाची सुरवात बाकीबाबांच्या कवितेन करपी तेन्नाचे मुख्यमंत्री लक्ष्मीकांत पार्सेकार पेडणेचे भूंयपूत. भाजपाक सत्तेर हाडपा पसून मुख्यमंत्री जावपा मेरेनचो मान तांकां मेळ्ळो. ते कुशळ शिक्षक. मुख्यमंत्री आसतना तांणीच कुशळटाय शिक्षणाची बुन्यादय घाल्ली. मनोहर पर्रीकार संरक्षण मंत्री म्हणून वतना पार्सेकार हांच्या हातांत मुख्यमंत्रीपद दिवन गेल्ले. पूण, तेच सरकार चलयतात अशो खबरो अदींमदीं येताल्यो. ते विशीं पार्सेकार हाणीं केन्नाच जाप दिली ना. तांच्याच सरकाराच्या काळांत 2016 वर्सा मोपा विमानतळाचो बुन्यादी फातर घाल्लो.
मोपा वेल्यान विमान येरादारी डिसेंबरांत सुरू जातली तेन्ना पार्सेकारबाब प्रदेश भाजपांत नासले तरी तांकां मानाची सुवात मेळटलीच. मोपाची बुन्याद घालतना पर्रीकार, पार्सेकार हाणीं फुडाराचीं सपनां पळयल्लीं आसतलींच. त्याच सपनाचें पडबिंब 2016-17 वर्साच्या अर्थसंकल्पात दिसतालें. तो अर्थसंकल्प मुख्यमंत्री डाॅ. प्रमोद सावंत हांकां नवो नासतलो. तातूंतली मोख 100 टक्के पुराय करपाचो वगत आयला. तशें करतना, मोपा वाटेन वतना सरकाराक नखलामी करपाचे येत्न जातलेच. खून, चोरी, दरोड्यां परस राज्यांत वाडिल्लें अपघातांचें प्रमाण मतींत घेतल्यार जण एकलो बेगोबेग म्हान जावपा पासत धांवपाक सोदता, अशें दिसता. मोपा जातना सगल्यांनी मुखेल करून आयचे, फाल्यांचे तरनाटे पिळगेन म्हानातलें म्हान जावन मळबांत उडपाचीं सपनां पळोवचींच पूण, नियंत्रण दवरूनच. पर्रीकर हाणीं उक्ते माचये वेल्यान पार्सेकार हांच्या सरकाराची तुस्त करूनय तांकां 2017 चे विधानसभा वेंचणुकेंत जैत मेळ्ळेंना. 2022 चे वेंचणुके वेळार भाजपाची उमेदवारी मेळूंक नाशिल्ल्यान ते भाजपातल्यान भायर सरले, हारले. राजकारणा पसून पयस उरले तरी तांचो शिक्षण क्षेत्रातलो, समाजकारणातलो वावर चालू आसाच. राज्याची उदरगत, येवपी संकश्टांचेर तांची नदर आसतलीच. हे फुडेंय ते सरकाराक मुखार पावलां मारपाक मजत करतले, अशी आस्त बाळगूया. घडये मोपा विमानतळच तांकां भाजपांत परत येवपाची वाट दाखोवपाची शक्यताय आसा.
मोपा जातनाच उत्तर- दक्षीण कनेक्टीविटीचो प्रस्न सोडोवपाक पयलींचे मुख्यमंत्री, उप मुख्यमंत्र्यांनी, येरादारी मंत्र्यांनी आपले विचार सरकारा कडेन मांडपाक जाय. हालींच भौशीक जमातींतल्यान येरादारीच्या प्रस्नाचेर भासाभास जाली, ताकतिकेन पुलीस येरादारी विभागाचे अधिक्षक म्हणून बाॅसुएट सिल्वा हांची नेमणूक जाल्या. ते अणभवी अधिकारी आसले तरी येरादारी विभाग तांचे खातीर नवो. पुलिसांतल्या वेगवेगळ्या विभागांनी वावुरतना शिस्तीन विशेश किजिलां विणे ते मुखारय पावले. गोंयांत वाडिल्ल्या येरादारीच्या साधनांची संख्या लक्षांत घेतल्यार पयलींचे अधिक्षक अरविंद गावस, आत्माराम देशपांडे हाणीं पुलीस येरादारी विभाग सांबाळटना केल्लो अभ्यास तांकां आतां उपेगी पडटलो असो दिसना तरी आदल्यो फायली आसल्यार त्यो पळोवच्योच.
काणकोण ते पेडणे मेरेनच्या रस्त्यांची पळोवणी करून पुलिस येरादारी विभागान येरादारी अधिकारीच न्हय जाल्यार नगरसेवक, आदल्या, आयच्या मंत्री, आमदारां वांगडा भासाभासेंतल्यान अचूक नियाळ घेवचो. जंय अपघात चड जातात थंय रस्ते अरुंद आसात, दोशी वटेंनी गाडयो, स्कुटरी, ट्रक पार्किंग करतात जाल्यार बेगोबेग उपाय करचे. गती खंय, कितली आसची, आसतली हें जायरातींतल्यान कळींत करचें पडटलेंच, त्या भायर भौशीक सुवातींनी तक्ते जाय. पुलीस येरादारी विभाग बळिश्ट करचो पडटलोच, आधुनिक साधनां वांगडा मनीसबळय जाय. येरादारी पुलीस म्हळ्ळ्यार फक्त तालांव दिवपी, हप्ते घेवपी अशी विभागाची जाल्ली प्रतिमाय नितळ करपाची जापसालदारकी सिल्वा हांकां घेवची पडटली.
मोपा जालो आमीय व्हड जातले अशीं सपनां पळयतल्यांचें जीवीत अपघातांनी सोपूंक जायना. अपघात जाल्यार रोखडे वैजकी उपचार मेळटले हे खातीर खासगी, सरकारी हाॅस्पिटलांतल्या अधिकारी, दोतोरां बरोबर बसका घेतल्यार प्रस्न सुटावो जावपाक बळ मेळटलें.
राजपाटण पणजेंत येवपी- वचपी लोकांचे, गाड्यांचे, हेर येरादारीच्या साधनांचे चोंबे पळेल्यार खिणाखिणाक अपघात जावपाक शकताले, पूण पणजे म्हापालिकेन शारांतले पार्किंग फी येवजण चालीक लायल्या, येरादारींत शिस्त हाडटना येणावळय वाडयल्या तरी तंटे, झगडीं आसतात. पुलिसांच्या आदारान, ट्रॅफिक सिग्नल्स, सीसीटीव्हीच्या उपेगांतल्यान म्हापालिका येरादारींत स्मार्ट जातलीच, हातूंत दुबाव ना. पणजेची देख हेरांनी घेवंक जाय जाल्यार पणजेतली येरादारीची कोयंडी फोडपा पासत साधनसुविधांचे बांदावळी बरोबरीन नवी येवजण वा नकाशो, ट्रॅफिक आयलॅण्ड बेगोबेग जाय. पणजेंतच न्हय तालुक्यांतल्या शारांनी 24 वरां येरादारी पुलिस मुखेल रस्त्यांनी आसल्यार, पार्किंग येवजणी केल्यार अपघाताचें प्रमाण कमी जातलें.
एका घरांत तीन- चार गाड्यो आसच्योच, पूण त्यो रातदीस रस्त्यार दवरूंक जायना हाची जतनाय घेवचीच पडटली. सुटकेझुजारी, मार्ग संघटनेचे फुडारी स. गुरुनाथबाब केळेकार हाणीं सरकारी पावंड्या मेरेन येरादारीची नवी नेमावळ नेमाळ्यांतल्यान पावयली, तातूंतय बदल जावपाची गरज आसा. 40 आमदारांनी जर आपापल्या मतदारसंघातले येरादारीचो अभ्यास करून नवे बांदावळी खातीर सुचोवण्यो केल्यार पुलीस येरादारी विभाग आराखडे बेगीन करूंक शकत व्हय?
केंद्रीय परिवहनमंत्री नितीन गडकरीजी हांचे कडल्यान इलेक्ट्रीक बशी, नव्या पुलां खातीर आश्वासनां मेळयतना लोकांच्यो गरजो समजून घेवपाक जाय. भौशीक येरादारीची नेमावळ बदलपाक जाय, ‘राव रे, देंवय रे’ थांबपाक जायच, कदंब आनी खासगी बसमालकांनी एकठांय येवन बऱ्यो सुविधा दिल्यार खासगी गाडयांची संख्या उणी जातलीच, अशें न्हय, पूण सुदारणां कित्याक जावच्यो ना?
मोपा विमानतळ खासगी कंपनीन मार्गाक लायिल्ल्यान भायल्यान मनीसबळ आयलें तरी थळाव्या कुशळ मनीसबळाचे निर्मणे खातीर सरकारान वेवस्था करची. मोपा लागसार कार्गो, लाॅजिस्टिक उद्येग फाटींफुडें जातलेच, ते विशींचे येवजणी विशीं पार्सेकारबाब सांगूक शकतले. मोपा उत्तर गोंयांत येवपी- वचपी वापरतलेच, पूण दक्षिणेत येवपाक, वचपाक दाबोळे कित्याक उरचो न्हय? दाबोळेंतल्या बांदकामांचेर बंदी हाडची पडटली, मडगाव, मुरगाव स्मार्ट सिटी खातीर आतां पसूनच येवजणी करच्यो पडटल्यो.
मोपा विमानतळ हें साठ वर्सांचे सपन. सगल्याच मुख्यमंत्र्यांनी तें पळयलें. नव्या विमानतळा वांगडा नवीं सपनां तरणाट्यां मदीं फुलतलींच, पूण प्रादेशिकताय राखून राज्याची प्रतिमा इबाडटल्यांक समज दिवपाची जापसालदारकीय तांकां सरकारा बरोबरीन घेवची पडटली. थंयच गोंयच न्हय गोंयकारपण, गोंयकारय म्हान जातले.

सुहासिनी प्रभुगावकर
9881099260