भांगरभूंय | प्रतिनिधी
भांगरभूंय । प्रतिनिधी
बेळगांवः बेळगांवांत मंगळारा कन्नडिंगानी कर्नाटक राज्योत्सव मनयलो जाल्यार मराठी भाशकांनी बेळगांवाचो कर्नाटकांत आसपाव केल्ले खातीर व्हो दीस ‘काळो दीस’ म्हणून मनयलो. मात खंयच कडेन अनुचीत प्रकार जाले नात.
बेळगांवचो पालक मंत्री गोविंद कारजोल हांणी राज्योत्सवा निमतान बेळगांवच्या जिल्हो स्टेडियमांत राष्ट्रध्वज तशेंच कन्नड ध्वज हुबयलो. कन्नड भास आनी संस्कृतचे राखणे खातीर कर्नाटक सरकार जायती पावलां घालता अशें तांणी ह्या वेळार सांगलें. ह्या उपरांत शारांत काडिल्ले मिरवणुकेंत कारजोल हांणी धोल वाजयलो. मिरवणुकेंत खासदार मंगला अंगडी, आमदार अनिल बेनके, बेळगांवचो उपायुक्त नितेश पाटील, पुलीस आयुक्त डॉ बोरलिंगा आनी हेर सरकारी अधिकारी वांटेकार जाल्ले.
बेळगांव जिल्हो आनी हेर वाठारांतले सुमार दोन लाख कन्नडिंग कर्नाटक राज्योत्सवांत वांटो घेवपाक बेळगांव शारांत आयिल्ले. 10 हजार फुटांचो कन्नड ध्वज हें राज्योत्सवा निमतान काडिल्ले मिरवणुकेंच मुखेल आकर्शण आशिल्लें. मराठी भाशकांनी काळ्या दिसा निमतान महाराष्ट्र एकिकरण समिती आनी शिवसेना उद्धव ठाकरे ह्यांच्या बावट्या खाला निशेध मेळावो आयोजीत केल्लो. तांणी शिवाजी गार्डना कडल्यान दुचाकी मिरवणूक काडिल्ली. पुलीस आयुक्त बोरलिंगा कायदो आनी सुवेवस्थेचेर नदर दवोरून आशिल्ले. पुराय बेळगांव शाराचेर सीसीटीव्ही आनी ड्रोन कॅमेऱ्यांनी नदर दवोरिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
