न्युझिलॅण्ड, बांगलादेश भोंवडेर वचपी टीम इंडियाची घोशणा

भांगरभूंय | प्रतिनिधी

न्युझिलॅण्ड आनी उपरांत बांगलादेशाचे भोंवडेर वचपी भारताच्या पंगडाची घोशणा केली. न्युझिलॅण्डाची भोंवडी संवसारीक टी-20 क्रिकेट सर्त सोंपल्या उपरांत 18 सावन सुरू जातली. हे भोंवडेर भारत तीन वन डे आनी तितल्योच टी-20 मॅची खेळटलो. ते उपरांत भारत बांगलादेशाचे भोंवडेर वतलो. थंय तीन वन डे आनी दोन टॅस्टी खेळटलो.

अश्टतासांचो खेळगडो यश दयालाक पयले खेपे भारताच्या पंगडांत सुवात मेळ्ळ्या. तो बांगलादेशा आडच्या वन डे माळेंत खेळटलो. यश दाव्या हातान फास्ट बॉलींग घालता आनी उजव्या हातान बॅटींग करता. मध्य प्रदेशाच्या रजत पाटीदाराक लेगीत ह्या फॉर्मेटांत सुवात मेळ्ळ्या.

सदचो मुखेली रोहित शर्मा, लोकेश राहुल आनी विराट कोहली हांकां न्युझिलॅण्डाचे भोंवडे खातीर विसव दिला. राहित शर्माचे गैरहाजरेंत हार्दिक पांड्या टी-20 पंगडाचें फुडारपण करतलो. जाल्यार वन डे माळेंत शिखर धवन मुखेल्याची जापसालदारकी सांबाळटलो.

विकेटकीपर बॅट्समन संजू सॅमसनाचें न्युझिलॅण्डा आडचे माळे खातीर पुनरागमन जालां. पूण, बांगलादेशाचे भोंवडे खातीर ताची निवड करूंक ना.

फास्ट बॉलर जसप्रीत बुमरा अजून बरो जावंक नाशिल्ल्यान ताची दोनूय भोंवड्यां खातीर निवड करूंक ना.

हार्दिक पांड्यान अजून मेरेन तीन टी-20 मॅचींनी भारताचें फुडारपण केलां आनी तिनूय मॅचींनी ताणें जैत जोडलां.

न्युझिलॅण्डा आड खेळपी टी-20 पंगडः हार्दिक पांड्या (मुखेली), ऋषभ पंत (उप मुखेली), ईशान किशन (विकेटकीपर), शुभमन गिल, दीपक हुड्डा, सुर्यकुमार यादव, श्रेयस अय्यर, संजू सॅमसन (विकेटकीपर), वॉशिंग्टन सुंदर, युजवेंद्र चहल, कुलदीप यादव, हर्षल पटेल, मोहम्मद सिराज, भुवनेश्वर कुमार, अर्शदीप सिंग आनी उमरान मलिक.

न्युझिलॅण्डा आड केळपी वन डे पंगडः शिखर धवन (मुखेली), ऋषभ पंत (उप मुखेली आनी विकेटकीपर), शुभमन गिल, दीपक हुड्डा, सुर्यकुमार यादव, श्रेयस अय्यर, संजू सॅमसन (विकेटकीपर), वॉशिंग्टन सुंदर, शार्दुल ठाकूर, शाहबाज अहमद, युजवेंद्र चहल, कुलदीप यादव, अर्शदीप सिंग, दीपक चाहर, कुलदीप सेन आनी उमरान मलिक.

बांगलादेशा आड खेळपी वन डे पंगडः रोहित शर्मा (मुखेली), लोकेश राहुल (उप मुखेली), शिखर धवन, विराट कोहली, रजत पाटीदार, श्रेयस अय्यर, राहुल त्रिपाठी, ऋषभ पंत, ईशान किशन, रवींद्र जडेजा, अक्षर पटेल, वॉशिंग्टन सुंदर, शार्दुल ठाकूर, मोहम्मद शमी, मोहम्मद सिराज, दीपक चाहर आनी यश दयाल.

बांगलादेशा आड खेळपी टॅस्ट पंगडः रोहित शर्मा (मुखेली), लोकेश राहुल (उप मुखेली), शुभमन गिल, चेतेश्वर पुजारा, विराट कोहली, श्रेयस अय्यर, ऋषभ पंत, के एस भारत, रविचंद्रन आश्विन, रवींद्र जडेजा, अक्षर पटेल, कुलदीप यादव, शार्दुल ठाकूर, मोहम्मद शमी, मोहम्मद सिराज आनी उमेश यादव.