भांगरभूंय | प्रतिनिधी
फोंडें: तिस्क उसगांव आनी खांडोळें वाठारांत सोमारा जाल्ल्या वेगवेगळ्या अपघातांनी दोन दुचाकी चालक जखमी जाले.
तिस्क उसगांवां एमआरएफ कंपनी लागसारच्या रस्त्याचेर कंटेनरा पोंदा दुचाकी चिड्डली. ह्या अपघातांत घनश्याम कुंकळीकार (39, ताळगांव) जखमी जालो. जाल्यार देवळाय खांडोळ्यां मालवाहू रिक्षा आनी दुचाकी हांचे मदीं जाल्ल्या अपघातांत दुचाकी चालक जखमी जालो. सोमारा सांजे मेरेन जखमीचें नांव कळूंक नाशिल्लें.
पुलिसांनी दिल्ले म्हायती प्रमाण जीए 07 जे 7170 नंबराची दुचाकी सोमारा सकाळीं 7 वरांच्या सुमाराक धारबांदोडेंच्यान फोंड्यांचे दिशेन वताली. एमआरएफ कंपनी मुखा वयल्या रस्त्याचेर अचकीत एपी 29 टीबी 7170 नंबराचो कंटेनर मुख्य रस्त्याचेर आयिल्ल्यान दुचाकी चिड्डली. वेळ वळखून दुचाकी चालकान रस्त्याचेर उडी मारिल्ल्यान तो जखमी जालो. ताका 108 एम्ब्युलन्सींतल्यान पिळये मुळाव्या भलायकी केंद्रांत दाखल केलो. हवालदार रघुनाथ गांवस हांणी अपघाताचो पंचनामो केलो. अपघात प्रकरणांत रोहीत मोरया (23, उत्तर प्रदेश) ह्या कंटेनर चालकाक ताब्यांत घेतला.
देवळाय खांडोळ्या सोमारा सकाळीं जीए 05 टी 2101 नंबराची रिक्षा आनी जीए 04 बी 6688 नंबराची स्कुटर हांचे मदीं अपघात जालो. तातूंत स्कुटर चालक जखमी जालो. जखमीक 108 एम्ब्युलन्सींतल्यान उपचारा खातीर गोमॅकाँत दाखल केलो. अपघात प्रकरणांत फोंडें पुलीस स्टेशनाचे उपनिरिक्षक विनोद साळुंके हांणी पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
