भांगरभूंय | प्रतिनिधी
भांगरभूंय । प्रतिनिधी
पोरणे गोंयः सुमार दोन दशकां उपरांत सान्ताक्रुज पंचायतीक पंचायत घर बांदपाक निमाणे जमीन मेळ्ळी. जमीन नोंदणी संचालनालयाच्या सर्वेयरांनी सोमाराक हे जमनीचो सर्वे केल्ल्यान पंचायत घर बांदपाची वाट आतां मेकळी जाल्या. सर्वे करतना सरपंच जेनिफर ओलिव्हेरा, उपसरपंच डॉमनीक परेरा आनी पंच वांगडी हाजीर आशिल्ले.
पंचायत घरा खातीर सर्वे केल्ले जमनीत अतिक्रमण केल्ल्यान ताचे आड पंचायत मंडळाक पयलीं कारवाय करची पडटली. पंचायत घराचे प्लॅन मंजूर करून घेवपाच्या वावराक आमी लागतले अशें सरपंच ओलिव्हेरा हिणे पत्रकारांक सांगलें. पंचायत कार्यालय स्वताचे सुवातेंत व्हरपाची मागणी थळावे लोका फाटल्या कांय वर्सां सावन करताले.
पंचायत जमनीत केल्लें अतिक्रमण काडून उडोवपाचें काम आमी करतले अशें उपसरपंच डॉमनीक परेरा हांणी सांगलें. अतिक्रमण केल्ल्याक आमी तें काडपाक सांगला. गरज पडल्यार कायदेशीर कारवाय करतले. तशेंच जमीन बळकाव प्रकरणाची चवकशी करपा खातीर स्थापन केल्ल्या पुलिसांचे विशेश चवकशी पंगडा कडेन (एसआयटी) लेगीत पंचायत मंडळ वतलें अशें तांणी सांगलें. पंचायत घर बांदपाक एक वर्स लागतलें अशें सरपंचान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
