भांगरभूंय | प्रतिनिधी
घाणयारें उदका प्रकल्पूय नाका; कुर्टी खांडेपार ग्रामसभेंत थाराव
भांगरभूंय । प्रतिनिधी
फोंडें: कुर्टी वाठारांत हे आदीं लोकांनी घाययाऱ्या उदका प्रकल्पाक विरोध केल्लो. फुडारांत लेगीत ह्या प्रकल्पाक विरोध कायम आसा. पंचायतीन लोकांक विस्वासांत घेतले बगर कसलेच दाखले दिवचे न्हय. तशेंच मुर्डी न्हंयेंत बांदपा आशिल्ल्या बांदाक थळाव्यांचो विरोध आसा. हे आदीं थळाव्या लोकांनी विरोध केल्ल्यान पंचायतीन बांदा खाती दिल्लो नाहरकत दाखलो फाटीं घेतिल्लो. फुडारांत लेगीत ह्या प्रकल्पाक पंचायतीन दाखले दिवचे न्हय, अशें थाराव आयतारा जाल्ले ग्रामसभेंत घेतले.
सरपंच नावेद तहसीलदार हांच्या मार्गदर्शना खाला आयतारा ग्रामसभेक सुरवात जाली. ह्या वेळार उपसरपंच विल्मा परेरा, पंच बाबू च्यारी, मनीष नायक आनी हेर पंच हाजीर आशिल्ले.
कुर्टी खांडेपार पंचायतीचे ग्रामसभेंत साबार विशयांचेर चर्चा करून म्हत्वाचे थाराव घेतले. पंचायत वाठारांतली ट्रक पार्कींग समस्या सोडोवचे खातीर विवीध खात्यां कडेन पत्र वेव्हार, घाणयाऱ्या उदका प्रकल्पाचो विरोध कायम दवरप, अशें म्हत्वाचे थाराव ह्या वेळार घेतले.
कुर्टी वाठारांत व्हड संख्येन ट्रक पार्क करतात. कितल्याशाच वर्सां सावन थळाव्या लोकांक तशेंच वाहन चालकांक ह्या पार्क केल्ल्या ट्रकांची आडखळ जाता. दर ग्रामसभेंत ट्रक पार्किंगाचो विशय तापतालो. आयतारा जाल्ले ग्रामसभेंत हे फुडें वाठारांत नो पार्कींग झोन करून थळाव्यांक थाकाय दिवपाचो थाराव घेतलो. तशेंच येरादारी खातें, येरादारी पुलीस आनी प्रदुशण मंडळाक लेगीत निवेदन दिवपाचो थाराव घेतलो. फाटल्या पंचायत मंडळान खरेदी केल्लीं कोयराचीं बल्लां अजून एका आदल्या पंचाच्या घरा आसात. तीं सगळीं कोयराचीं बल्लां मागोवन घेवपाचो थाराव लोकांनी घेतलो. कोयराचीं बल्लां खरेदी करचे खातीर पंचायतीन 18 लाख मोडिल्ले. तीं बल्लां लोकांक दिवपाची गरज आसा, अशें लोकांनी पंचायत मंडळाचे नदरेक हाडून दिलें.
पंचायत मंडळ लोकां वांगडाः सरपंच
मुर्डी खांडेपार वाठारांतले लोक बांदाक विरोध करतात. पंचायत मंडळ लेगीत लोकां वांगडा रावतलें. तशेंच कुर्टी वाठारांत रस्त्याचे कुशीक ट्रक पार्क करतात थंय नो पार्कींग झोन करपा खातीर विवीध खात्यां कडेन पत्र वेव्हार करतले, अशें सरपंच नावेद तहसीलदार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
