भांगरभूंय | प्रतिनिधी
गोंयच्या सगळ्या कोनशांतल्या भक्तांक आकर्शीत करपी फामाद कोलवा गांवचें, फामा दे मिनिनो जेजूस, ह्या वर्सा 17 ऑक्टोबराक आवर लेडी ऑफ मेर्सेस इगर्जेन मनयलें. दबाज्याची मुखेल मिसाची भेट सकाळीं 5.30 वरांचेर जाली, जाचे उपरांत बाळक जेजूची चमत्कारीक मूर्त वेदीवेल्यान सकयल हाडली आनी उपरांत मिरवणूक, बॅनराचेर आशिर्वाद आनी बाळकाचो उमो घेवपाक सुरवात जाली. 27 ऑक्टोबराक हें फेस्त कोलवाकारांनी मनयलें.
अवर लेडी ऑफ मेर्सेसाक समर्पीत केल्ली ही इगर्ज जेझुईतांनी इ. स. 1630 वर्सा कपेल म्हणून बांदिल्लें. सुरावले आनी बेतालबाती ह्या इगर्जां वांगडाच 28 मे 1635 ह्या दिसा तिकाय इगर्जेचो दर्जो मेळ्ळो.
एके आख्यायिके प्रमाण, सुरवेच्या पुर्तुगेज राजवटीच्या काळांत दर्यांतल्या नुस्तेमाऱ्यांक दर्याचे कुशीक आशिल्ल्या एका ल्हान जुंव्याचेर, दर्यांतल्या गुलांचो व्हडलो कळप घुंवतना दिसलो. जशे ते जुंव्या वटेन मुखार वचत रावले तेन्ना तांकां पयसुल्ल्यान कितें तरी चकचकीत आनी परावर्तन करपी दिसलें. जुंव्या लागीं पावतकच, बोटाचेर मुदी आशिल्ल्या बाळकाची लांकडी कोरांतिल्ली सोबीत मूर्त तांकां सांपडली. भियेल्ले आशिल्ले, तरी तांणी ती मूर्त काडून कोलवा इगर्जेंत आशिल्ल्या जेझुईत पाद्रीं कडेन व्हरून दिली. पाद्रींनी ती बाळक जेजूची मूर्त म्हूण वळखून तिची भक्ती करपाक सुरवात केली. ही खबर सगळ्या कोनशांनी पातळ्ळी आनी, जायत्या जाणांनी चमत्कारीक संकेत आनी परोपकार केल्ल्याचो दावो केल्ल्यान ताची नामना जावन इगर्जेंत गर्दी वाडपाक लागली आनी ताका लागून फामा मनोवपाक लागले.
दुसरे आख्यायिके प्रमाण, “एक जेसुईत पाद्री, फादर बेनिटो फेरैरा एस जे-क, मोझांबीकाच्या दर्यादेगेर ही मूर्त मेळ्ळी आनी आपल्या वांगडा ती ताणें गोंया हाडली, आनी अवर लेडी ऑफ मेर्सेस, कोलवा जंय ताची नेमणूक जाल्ली हांगा वेदीचेर एक खासा सुवात तयार करून ती ताणें थंय बसयली.”
पूण जेझुईत पाद्रींक राशोल सेमिनारींत हस्तांतरीत जावूंक आदेश आयलो तेन्ना ही परब थांबली, कारण वतना जेझुईत पाद्रींनी ती मूर्त आपल्या वांगडा व्हेली. हे मुर्ती कडेन भावनीक रितीन जुळिल्ले आशिल्ल्यान, कोलवाचे गांवकार राशोल गेले आनी थंय वचून जेझुईत पाद्रींनी ती मूर्त तांकां परतून दिवची अशी विनवणी केली. पूण तांची विनवणी पाद्रींनी न्हयकारली आनी गांवचे लोक दुख्खी आनी रित्या हातांनी परतले.
परतल्या उपरांत तांकां कळ्ळें की बाळक जेजूच्या बोटाचेर आशिल्ली मुदी वेदीच्या कोनशांत एके खांचीत पडल्या. ती मेळिल्ल्याची तांकां खूब खोशी जाली आनी तसलीच आनीक एक मूर्त तांणी तयार केली आनी ताच्या बोटाचेर ती मुदी घालून आपलो आदर उक्तायलो आनी ताची भक्ती करपाक सुरवात केली. दर वर्सा ऑक्टोबराच्या दुसऱ्या सोमारा, फेस्ताच्या णव दिसा आदीं धर्मीक सेवा सुरू जातात.
सियालिनी फेर्नांडीस
9923021022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
