भांगरभूंय | प्रतिनिधी
हालींच जाल्ले विधानसभा वेंचणुकेंतल्यान गोंयांतल्या विरोधी काँग्रेस पक्षांतल्या, वेंचून आयिल्ल्या 11 आमदारां पैकीं दिगंबर कामत हांच्या फुडारपणा खाला आठ आमदारांनी सत्ताधारी भारतीय जनता पक्षांत प्रवेश केलो आनी परतून एक फावट विरोधी पक्ष पुरायपणान दुबळो जालो, अशी भासाभास सुरू जाली.
मुदलांत समजून घेवपाक जाय तें म्हळ्यार विरोधी पक्ष सुवात फकत विरोधी पक्षांतल्या आमदारांच्या आंकड्यांचेर थारना. जे आमदार विरोधी म्हणून वेंचून येतात, तांच्यांत सरकारी पक्षाच्या ध्येय – धोरणां आड श्रद्धा जाय. गोंयांत अशी ध्येय धोरणांची श्रद्धा ना विरोधी पक्षांत उरल्या, ना सत्ताधारी पक्षाक. सत्ताधारी भारतीय जनता पक्षय विरोधी काँग्रेस पक्षांतल्यान फुटिरांक व्हरून व्हरून आपलो पक्ष सुजयत आसा. जाल्यार, काँग्रेस पक्षाचो भारतीय जनता पक्षाच्या बहुमतवादा आड लोकां मदीं जो सिद्धांतीक विरोध आसा ताच्या आदारान तांचे आमदार वेंचून येतात. पूण तांकां खुद्द ते विशीं कसलीच लागणूक ना. तांकां फकत काँग्रेस ही गाजराची पुंगी. ‘वाजली तर वाजली, नाजाल्यार मोडून खाल्ली.’ ह्या फुटीर गटाचे फुडारी दिगंबर कामत ही ताची सामकी बरी देख!
तांकां भारतीय जनता पक्षांत पर्रीकाराक लागून मुख्यमंत्री जावपाचें स्वप्न लेगीत रंगूंक मेळ नासलें म्हणून कांय सॅक्युलर मित्रमंडळीच्या प्रमोशन आनी ‘मुलाम्याच्या’ आदारान तांणी सॅक्युलर आनी घुस्मट म्हणत काँग्रेसींत उडी मारली आनी मुख्यमंत्रीपद हातासलें. आतां थंय रावन सत्ता मेळना म्हणटकच पर्रीकार बरो ना तेन्ना सावन तांची भाजपांत वचून परतून एक फावट सत्तेंत सामील जावपाची वळवळ सुरू आसली. तांणी निमणे ती साध्य केली. विरोधी पक्ष कित्याक, ताचें ध्येय धोरण कितें आनी तो कित्याक विधानसभेंत वा भायर आसचो हाचो जर विचार केल्लो जाल्यार कायम सत्तेंत रावपाक सोदपी दिगंबर कामत सारक्या आमदारांचो विचार केल्यार आनी आस्त बाळगिल्यार फकत विवंचनाच पदरांत पडटली. देखून दिगंबर कामत हांच्या फुडारपणा खालचो आठ आमदारांचो पंगड भारतीय जनता पक्षांत गेलो म्हणून ना विरोधी पक्ष सुवातीक फरक पडला ना ही भाजपा विरोधी ‘कन्विक्शन’ बाळगुपी मतदारांक. फकत काँग्रेस पक्षाची सूज उणी जाल्या आनी सत्ताधारी भाजपाची तकली फोड वाडल्या इतलेंच तें.
विरोधी वाठारांत वा सुवातींत आतांय म्हणून काँग्रेस वा हेर पक्षांत उरल्यात ते सगळेच आमदार कितें ध्येय धोरणाचेर विरोध म्हणून थोडेच. कांय जाणांचें सादूंक ना म्हणून ते हे वटेन, इतलेंच. म्हणून म्हत्वाचो मुद्दो हो की मुदलांत लोक शिक्षण जावपाची गरज आसा आनी म्हत्वाचो प्रस्न म्हळ्यार अशी विरोधी पक्ष सुवात घटमूट आसपाची गरज लोकशायेंत आनी आमच्या लोक प्रतिनिधींक लोकशायेंत कितें? विधानमंडळांत वा भायर विरोधकांची मुळावी भुमिका कितें? हातूंत मुखेल विरोधी पक्ष, बारीक पक्ष आनी अपक्ष आमदार हांचोय आसपाव जाता. गोंयच्या दुर्दैवान फाटल्या कांय तेंपा सावन बारीक पक्ष आनी अपक्ष ह्यो मुखेल पक्षांक सत्तेर येवपाक जाय पडपी धिगयो थारिल्ल्यान तांचो खरेपणान विरोधी ध्येय धोरणांच्या नदरेन ‘शुन्य’ उपेग!
पूण प्रत्यक्षांत विरोधी मतांचेर वेंचून आयिल्ल्या मुखेल आनी बारीक पक्ष आनी अपक्ष आमदारांची भुमिका स्पश्ट आसूंक फावो. 1. सरकाराक जाब विचारप. सरकाराक जापसालदार धरप. 2. सरकाराच्या चुकीच्या कामाक पर्याय दिवप. 3. सरकाराकच आपूण कसो पर्याय म्हणून फुडें येवं येता ताचो विश्वास लोकां मदीं घडयत वचप. जर आमदारांची नदर सद्याच्या सरकारांत मंत्रीपद, पयशांचें आमीश वा आनीक कसलीय स्वताचीं वैयक्तीक कामां करून घेवपाचीं हाचेर कायम आसत जाल्यार वयर दिल्ल्या तिनूय गजालींचे बाबतींत तांचो उपेग शुन्य! फाटल्या कांय वर्सांत भारतीय जनता पक्ष तोड मोड करून सत्तेर येत सावन विरोधी पक्षांत ही वृत्ती घेवन काम करपी आमदार वाडत आसात. ताका लागून विरोधी वटेन आमदार वेंचून येतात पूण ते त्या विरोधी सुवातीचे ना प्रतिनिधित्व करतात ना विरोधी पक्ष म्हणून पक्षाक फुडें व्हरतात. ही एक मोठी विसंगती. विरोधी पक्ष म्हणून काम करतना विरोधी पक्षाक विधानसभेंत मान्यताय दिवप, विरोधी पक्ष फुडारी म्हणून मान्यताय आनी स्टेटस, आदी गजाली वगीच नात. ताचे फाटल्यान सरकाराचीं ध्येय धोरणां तपासपाक विरोधी पक्षाक खास हक्क (प्रिविलेजीस) दिवप हो हेत आसा. आमदार जेन्ना विधीमंडळांत उलयतात तेन्ना तांकां विशेश हक्क आनी विशेशाधिकार वगीच नात. भंय वा न्यायालयीन केशींच्या कटकटी बगर स्पश्टपणान उलोवपाक मेळप हो हेत या सगळ्या फाटीं आसा. विधानसभेंत अदमासपत्रक मांडप, ताचेवेली भासाभास, प्रश्नोतराचें वर अशें तरेकवार कामकाज विरोधकांक वाव दिवपाक रचलां. म्हत्वाची गजाल हांगा लक्षांत घेवपाची म्हळ्यार देशान जो म्हायती हक्क कायदो 2005 वर्सा चालीक लायलो ताच्या हेतू – प्रस्तावनेंत म्हळां, ‘जी जी म्हायती संसदेंत वा विधीमंडळांत वांगड्यांक मेळपाक जाय ती मेळपाचो अधिकार हो कायदो जनतेक दिता.’ अशें आसूनय संसदेंत आनी विधीमंडळांत लोक प्रतिनिधींक खरेपणी लोकांचीं कामां करपाक, सरकाराक जाप विचारपाक आनी ताची लागणूक तपासपाक आनिकूय विशेशाधिकार आसात. थंय खासदार आमदार तारांकीत प्रस्न म्हळ्यार जाचेर उप-प्रस्न विचारूंक शकतात… (हो अधिकार जनतेक म्हायती हक्क कायद्यांत ना)!
वयर केल्या ती चर्चा लक्षांत घेतल्यान पक्ष सोडून वतात त्या सत्तेच्या गोडा धेपेक चिकटुपी दोंबळ्यांक विरोधी पक्ष आमदार म्हणपच समा जावचें ना. विरोधी मतदारांची
जी सुवात आसा ती रिकामी ना उरची, थंय विरोधी सुवाती विशीं श्रद्धा बाळगुपी आनी विरोधाची निसण पांवड्या-पांवड्यान चडून वचून पर्यायी सरकार घडोवपाचो हावेस बाळगुपी आमदार दिवप ही जापसालदारकी खरें म्हळ्यार मतदारांची. हांगा निरशेणी आनी आळस हांकां मतदारांनी थारो दिवपाक जायना. लोकमत फकत वेंचणुको येतकच घडपाक रावत तर असलो मजबूत विरोधी पक्ष घडचो ना. जी सुवात निर्माण जाल्या ती भरपाक कामाक लागपाची वेळ आयचीच आसा.
विरोधी पक्षांत आमदार कशे आमचे हाच्यो देखी गोंयांत जरूर जावन गेल्यात. तातूंत जॅक सिकेर, माधव बीर, काशिनाथ जल्मी, मनोहर पर्रीकार अशे खडेगांठ फुडारी जावन केल्यात जांणी ही सुवात कितें आनी कशी वापरपाची ताची देख घालून दिल्या. विरोधी ध्येय धोरणांचेर, मत प्रणालीचेर विचारधारा हांचेर विचार करपी मतदारां फुडलें हें आव्हान आसा. ‘ताकाक येवन गाडगो लिपोवपी’ सत्तेक आशेल्ल्या आमदारांनी गोंयांतली विरोधी पक्ष सुवात मेकळी केल्या… एके तरेन सुंटी बगर खोकली गेल्या…
प्रकाश वामन कामत
9422443003
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
