भांगरभूंय | प्रतिनिधी
ऍक्शन आनी नाट्यमय अशी थरारक आनी उत्कंठा वाडोवपी पुस्तकां आनी खास करून कादंबरी वाचकांक खूब भावतात. सस्पॅन्स प्रकाराच्यो कादंबर्यो मनरिजवणेचें उत्तम माध्यम थारता. मनोहर माळगांवकर हांची ‘स्पाय इन एम्बर’ ही अशीच एक रहस्यमय कादंबरी.
ती 1980 च्या दशकांत भारत आनी चीन हांचे मदलो संघर्श दाखयता. इंडो चीनांतले अस्थीर समाजीक – राजकी परिस्थितीची फाटभूंय आशिल्लें हें कथानक ल्हान आनी साहसी आसा. ही कथा लोकवस्ती नाशिल्ल्या आनी गूढ अशा थंड वाळवंटांत स्थीत आशिल्ल्या तिबेटांतल्या राग्यभास मोनॅस्ट्रींत घडटा. देवाचे भक्तीन मग्न आशिल्ल्या आनी देवा कडेन एकरूप जावपाची इत्सा आशिल्ल्या भिख्खूंचे (monks) गुप्त जिणेचें थोड्या भितर दर्शन घडयता.
हेड लामा (मुख्य लामा) मोनॅस्ट्रींत लिपयल्ल्या व्हडल्या खजिन्या विशीं सगळ्यांक सांगता आनी दिल्लींतल्या भारत सरकाराक तो सुरक्षीत रितीन पावोवपाक जाय अशी घोशणा करता. जीत मानसिंग हो धाडसी आनी रुबाबदार दिसपी गुप्तहेर. ह्या खजिन्याची जतनाय घेवपाची आनी राखण करपाची जबाबदारी ताचेर आसता. चीनी सरकाराक हे येवजणेची म्हायती आसता. हो खजिनो सुरक्षीतपणान दिल्ली पावोवपाची येवजण अयशस्वी करून तो खजिनो चीनाक पावोवपाचें काम चीनी सरकार चोमो जंग ह्या निर्दयी एजंटाक दिता. पेम्पेम काचीन हें एके सोबीत चलयेचें पात्र. आपले सोबीतकायेचो फायदो घेवन ती हो खजिनो चीनांत हाडपा खातीर वावुरता. ह्या तिनूय पात्रांचें चित्रण लेखकान बरें रंगयलां.
ही काणी हिमालयांत सुरू जाता आनी मुखार नवी दिल्लींत पावता तेन्ना आनीक रहस्यमय जाता. जीत मानसिंह आनी ताची मोगी निरूपा, पेम्पेम आनी चोमो मेरेन पावपा खातीर वेगवेगळे संकेत सोडोवपाचो यत्न करतात. ‘मोर्स कोड’ हो संकेत सोडोवप, ल्हान- ल्हान गल्लींतल्यान एजंटांचो पाटलाव करप आनी कागदाच्या कुडक्यांतल्यान पुरावे मेळोवपाचो यत्न करप अशा जायत्या घटकांचो वापर करून लेखकान वाचकांची उत्कंठा वाडोवपाचो यशस्वी यत्न केला. सादे शैलींत पूण रोमांचक भाशेंत बरयल्लें हें पुस्तक
हेरगिरी संबंदीत एक म्हत्वाची कादंबरी आसा.
लेखका विशीं : आंतरराष्ट्रीय माचयेर नामना जोडपी जायते भारतीय साहित्यीक आसात; रवींद्रनाथ टागोर, आर. के. नारायण, सलमान रश्दी, विक्रम सेठ, झुम्पा लहिरी, किरण देसाय हीं कांय म्हत्वाचीं नांवां. मनोहर माळगांवकर हांचे विशीं आर. के. नारायण हांणी एक फावट म्हणिल्लें, “इंग्लीशींतलो आवडीचो भारतीय कादंबरीकार.” माळगांवकर हे उत्कृश्ट दर्ज्याचें साहित्य निर्माण करतात तरी पूण तांचें नांव घडये मेजक्याच लोकांनी आयकलां आसतलें. ज्या काळार समाजीक-सांस्कृतीक विशयांचेर मोट्या प्रमाणांत साहित्य निर्मणी जाताली त्या वेळार माळगांवकर हांणी हेरगिरी संबंदीत रहस्यमय पुस्तकां बरयलीं. इतले आसुनूय तांचीं पुस्तकां प्रसिद्ध कित्याक जावंक ना काय म्हणून प्रस्न पडटा. तांचीं इंग्लीश भाशेंतलीं हेर कांय उत्कृश्ट पुस्तकां म्हणल्यार – ‘अ बॅण्ड इन द गँजीस’, ‘डिस्टण्ट ड्रम’.
शर्वरी प्रभुदेसाय
9822832614
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
