भांगरभूंय | प्रतिनिधी
मुरगांवः वेळसांवच्या रेल्वे रुळा कुशीक रावपी लोक रेल्वे अधिकाऱ्यांच्या तेमांक नी तांचे कडल्यान परतून परतून जावपी सतावणुकेक लागून तिडकल्यात. रेल्वे विकास निगम लिमिटेडान 28 ऑक्टोबराक परतून एकदां रेर्ले रुळा लागसारची परंपरीक वाट आडावन दुरीक घालपाचें काम सुरू केल्ल्यान वेळसांवच्या लोकांनी खर हरकत घेतली आनी तांचें काम बंद उडयलें.
रेल्वे विकास निगम लिमिटेडान वेळसांवां रेल्वे दोट्टीकरणा खातीर थंयच्या थळाव्या लोकांची खाजगी जमीन बळकावपाचो परतून एकदां यत्न केलो. हे खातीर ते परतून परतून रेल्वे पुलीस बळाचोय वापर करतात. मात थळावे लोक एकठांय येवन त्या रेल्वे अधिकाऱ्यांक कितलेशेच खेपे धांवडावन रेल्वेचें कारस्थान मोडून उडयलां.
मजगतीं, 28 ऑक्टोबराक परतून एकदां रेल्वे विकास निगम लिमिटेडान रेल्वे रुळा लागसारची लोकांची परंपरीक वाट आडावन दुरीग घालपाचें काम सुरू केल्ल्यान थळावे लोक चाळावले. तांणी ह्या कामाक हरकत घेवन तांकां काम बंद करपाक लायलें. रेल्वे विकास निगम लिमिटेडाचे कर्मचारी रेल्वे रुळा लागसार दुरीग घालपाचो यत्न करतात ही गजाल निरशेवणी दिवपी तशेंच धपको दिवपी आसा. आयज परतून एकदां रेल्वे कर्मचाऱ्यांनी बेकायदो तरेन दुरीक घालपाचें काम सुरू केलें आनी कांय वांटो बंद करपाचो यत्न केलो. वेळसांवांत कसलेंच भूसंपादन जावंक ना. रेल्वे विकास निगम लिमिटेड जमीन धनयां कडल्यान नाहरकत दाखलो वा भूसंपादन केले बगर काम कशें करपाक शकता, असो प्रस्न व्हिलेज ॲक्शन क्मिटी अगेन्स्ट डबल ट्रएकींगचे संस्थापक वांगडी आरविलो दोरादो रॉड्रिक्स हांणी केलो. खाजगी जमनींत आनी खाजगी रानांनी रेल्वे बेकायदो घुसखोरी करता आनी लोकांक गरजे भायर सतयता, असो दावो तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
