भांगरभूंय | प्रतिनिधी
राज्यपाल पी. एस. श्रीधरन पिल्लईः कुंकळ्ळीचे उदरगती विशीं सरकारा कडेन उलोवपाचें उतर
भांगरभूंय । प्रतिनिधी
मडगांव: लोकशक्ती सर्वोच्च आसा. सरकारी पदाचेर आशिल्ल्या दरेका व्यक्तीची लोकसेवा ही लागणूक आसा. दरेका एका गरजू व्यक्ती मेरेन पावप ही आपली मोख आसपाक जाय. विमान पायलट आशिल्ले कुंकळ्ळीचे आमदार युरी आलेमांव हांणी लोकांची सेवा करचे खातीर आपलो विमान पायलटाचो वेवसाय सोडलो हाचो आपल्याक अभिमान आसा, अशें राज्यपाल पी. एस. श्रीधरन पिल्लई हांणी म्हणलें.
कुंकळ्ळी मतदारसंघाचे भोंवडेर आसताना चांदर क्लबांत आयोजीत केल्ले कार्यावळींत राज्यपाल उलयताले. ह्यावेळार विरोधी पक्ष फुडारी आनी थळावे आमदार युरी आलेमांव, कुंकळ्ळीचे नगराध्यक्ष लक्ष्मण नायक, राज्यपालांचे सचीव मिहीर वर्धन, अतिरिक्त जिल्होधिकारी परेश फळदेसाय, उपजिल्होधिकारी उदय प्रभुदेसाय, जिल्हो पंचायत सदस्य संजना वेळीप, फा. जीन दा क्रूझ फर्नांडीस माचयेर हाजीर आशिल्ले.
कुंकळ्ळी मतदारसंघाक सैमाचें वरदान लाबलां. चांदर हो भारतांतल्या सोबीत गावां मदलो एक. लोकप्रतिनिधींनी मांडिल्ल्या समस्या कडेन आपूण निश्चीतपणान लक्ष दितलों आनी कुंकळ्ळी मतदारसंघांतल्या उदरगतीच्या कामां संबंदांत सरकारा कडेन उलयतलों, अशें राज्यपाल पिल्लई हांणी सांगलें.
माकाझानाचे सरपंच आग्नेलो डिकोस्टा आनी पाड्डेंची सरपंच मनिषा नायक, गिरदोलीचे कार्यकारी सरपंच जुआंव पिशोट, चांदरचे पंच डेरेक पेरैरा हांणी तांच्या पंचायतींतल्या विंगड विंगड समस्यांचेर लक्ष केंद्रीत करपी निवेदनां राज्यपालांक सादर केलीं. चांदरचे सरपंच एस्टेफानियो डायस हांणी येवकार दिलो.
राज्यपालांनी कुंकळ्ळी मतदारसंघातल्या 10 कॅन्सर आनी णव डायलिसीस दुयेंतींक अर्थीक मजतीचे चेक वितरीत केले आनी उरिल्ले चेक रोखडेच दितले, अशें उतर दिलें.
थळाव्या परंपारिक कलेक चालना दिवपाच्या यत्नाक विरोधी पक्ष फुडारी युरी आलेमांव हांणी राज्यपालांक देमानी- कुंकळ्ळीच्या चितारींनी तयार केल्या परंपारीक पाटाची जोडी भेट दिली आनी ह्या कारागिरांक उर्बा दिवपा खातीर सरकाराक सुचोवणी करपाची राज्यपालांक विनवणी केली. राज्यपाल पिल्लई हांणी कुंकळ्ळीच्या चीफटेन्स स्मारकाक पुष्पचक्र ओंपून आपले भोंवडेची सुरवात केली. चांदर वाठारांतलें दायज थळ आशिल्या ब्रागांझा हावसाक तांणी भेट दिली. तांचे वांगडा तांची घरकान्न रीटा पिल्लई, आमदार युरी आलेमांव आनी हेर मानेस्त हाजीर आशिल्ले.
चितारी कलेक सरकारी मजतीची गरजः आलेमांव
युरी आलेमांव हांणी सांगलें 2012 सावन कुंकळ्ळी मतदारसंघ उदरगती सावन पयस उरला. कुंकळ्ळी मतदारसंघांत अत्याधुनीक भलायकी केंद्राची गरज आसा. सरकारान कुंकळ्ळीच्या सुशिक्षीत तरणाट्यां खातीर रोजगाराच्यो संधी तयार करपाक जाय. हेरिटेज टुरिझम खाला चांदर गांव हाडपाची गरज आसा. तशेंच देमानी-कुंकळ्ळीच्या परंपारिक चितारी कलेक सरकारी मजत मेळपाची गरज आसा, अशें आलेमांव हांणी सांगलें. राष्ट्रीय महामार्ग 66 प्रस्तावीत बायपास संरेखीत करताना लोकांचीं घरा वाटावपाचो यत्न जावपाक जाय अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
