भांगरभूंय | प्रतिनिधी
भांगरभूंय । प्रतिनिधी
दिवचलः दोडामार्ग सुरूचीवाडी हांगच्या नवकिरण युवा मंचान दिवाळे निमतान आयोजीत केल्ले आकाश दिवो सर्तींत गोंयांतल्या सर्तकांनी पयलीं तीन इनामां मेळयलीं. फोंडेच्या दत्तप्रसाद गावडेक पयलें, सुर्लाच्या जयंत वाघोणकाराक दुसरे आनी भिरोंडेच्या आनंद गावडेक तिसरें इनाम फावो जालें. चवथें इनाम आमोण्याच्या आकाश फडतेन मेळयलें. सर्तींत 32 सर्तकांनी आपले आकाश दिवे दवोरिल्ले. सिंधुदुर्ग जिल्ह्या सयत गोंयांतल्या सत्तरी, फोंडें, दिवचल, बार्देश आनी पेडणे तालुक्यांतल्या सर्तकांनी सर्तींत वांटो घेतिल्लो.
कोरोनाक लागून फाटलीं दोन वर्सां ही सर्त घेवप शक्य जावंक नाशिल्लें. दोडामार्ग बाजारांतल्या पिंपळेश्वर सभाघरांत अंदू ही सर्त जाली. तरतरेचे आकाश दिवे पळोवपाची संद हे सर्तीक लागून दोडामार्ग वाठारांतल्या लोकांक मेळ्ळी. ध्रुव तांबूळकार आनी प्रभाकर मयेकार हाच्या मार्गदर्शना खाला ही सर्त जाली. इनाम म्हणून दत्तप्रसाद गावडेक रोख 5 हजार, वाघोणकाराक 3 हजार, आनंद गावडेक 2 हजार आनी आकाश फडतेक 1500 रुपये मेळ्ळे.
आयुष फडते (आमोणें ), सुरेंद्र सतरकार ( फोंडें), सगुण गांवस ( वझरी), विनोद गांवकार (वाळपय ), प्रवीण राणे ( पर्ये ), शिवानी उगाडेकर (दोडामार्ग ) आनी अमित पुजारी (कळंगुटे) हांक उमेद वाडोवपी इनामां दिलीं. सर्तीचें परीक्षण संदीप गांवस आनी अंकुश मिरकार हांणी केलें. इनाम भेटवण कार्यावळीक दोडामार्ग नगर पंचायतीचे नगराध्यक्ष चेतन चव्हाण, बांदकाम समिती सभापती नितीन मणेरिकार, श्याम चांदेलकार, मनोज पार्सेकार, संयज शिरोडकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
