भांगरभूंय | प्रतिनिधी
भांगरभूंय । प्रतिनिधी
म्हापशेंः फाटल्या 21 ऑक्टोबराक आपल्या मागण्यां खातीर केल्ल्या संपात वांटेकार जाल्ल्या कर्मचाऱ्यांचेर कारवाय करपाक म्हापशें पालिका मंडळान सुरवात केल्या. सध्या तीन कर्मचाऱ्यांक कारणां दाखय नोटिसी धाडल्यात तशेंच कोयराची येरादारी करपी ट्रकाची मोडतोड केल्ले खातीर म्हापशें पुलीस स्टेशनांत कागळ केल्या.
कर्मचारी युनियनान सादर केल्ल्या मागणीपत्रकाची कार्यवाही जायना देखून कर्मचाऱ्यांनी संप सुरू केल्लो. पालिका मंडळान तो मोडपाचो यत्न केलो. निमाणे सांजे कर्मचारी युनियनाच्या फुडाऱ्यां वांगडा उलोवणी करून मागण्यो मानून घेवपाचें आस्वासन दिल्या उपरांत संप फाटीं घेतिल्लो.
आतां पालिका मंडळान ह्या संपांत वांटेकार जाल्ल्याचेर कारवाय करपाचें सत्र सुरू केलां. कुचेली हांगच्या कोयर प्रकल्पांत पार्क केल्ल्या कोयराची येरादारी करपी ट्रकाची अनवळखी लोकांनी मोडतोड केल्ल्यान म्हापशें पुलीस स्टेशनांत मुख्याधिकाऱ्यान कागाळ केल्या. ताचे वयल्यान पुलिसांनी पीडीपीपी कायद्या खातार गुन्यांव नोंद केला.
संपांत वांटेकार जाल्ल्या कर्मचारी युनियनाच्या तीन पदाधिकाऱ्यांक मुख्याधिकाऱ्यान नोटिशी धाडून तांचेर कारवाय कित्याक करची न्हंय हाची कारणा दिवपाक सांगल्यांत. कर्मचाऱ्यांनी केल्लो संप बेकायदेशीर आशिल्लो. तातूंत वांटेकार जाल्ल्या कर्मचाऱ्यांचेर कारवाय करपाची सूचोवणी पालिका मंडळांतल्या 19 नगरसेवकांनी पालिका मुख्याधिकाऱ्याक केल्या आनी कारवाय करपा संबंदी तांकां मेकळीक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
