भांगरभूंय | प्रतिनिधी
संवसारीक टी-20 क्रिकेट सर्तीच्या सुपर 12तल्या गट दोनांतले मॅचींत दक्षीण आफ्रिकेन बांगलादेशा आड 104 धांवड्यांनी व्हड जैत जोडलें.
दक्षीण आफ्रिकेन टॉस जिखून पयलीं बॅटींग करपाचो निर्णय घेतलो आनी निर्धारीत 20 ओव्हरींनी 5 बाद 205 धांवड्यांचो दोंगर उबारलो. प्रत्युत्तर दितना बांगलादेशाचो डाव 16.3 ओव्हरींनी फक्त 101 धांवड्यांचेर सोंपलो.
बांगलादेशान पयली मॅच जिखून गुणतकट्यांत पयली सुवात मेळयिल्ली. पूण, काल दक्षीण आफ्रिके आड हार घेवची पडली. हे हारी उपरांत बांगलादेशाची पयली सुवात गेली आनी ताची नेट रनरेट लेगीत निगेटिव्ह जाली.
दक्षीण आफ्रिका दोन मॅचींतल्यान तीन गूण घेवन दुसरे सुवातेर पावलो, जाल्यार बांगलादेश दोन मॅचींतल्यान दोन गुणां सयत तिसरे सुवातेर घसरलो. भारत दोन मॅचींतल्यान चार गूण घेवन पयले सुवातेर आसा.
आफ्रिके वतीन रिले रोसोन 109 धांवड्यांची खेळी केली. संवसारीक टी-20तलो ताचो हो पयलोच शेंकडो. तशेंच हे सर्तीच्या इतिहासांतलो शेंकडो मारपी तो आफ्रिकेचो पयलोच बॅट्समन. तशेंच टी-20 कारकिर्दींतलो ताचो हो दुसरो शेंकडो. रोसोन 56 बॉलांनी सात चवके आनी आठ सके मारले. ताचे खेरीत क्विंटन डी कॉकान 38 बॉलांनी 63 धांवड्यांची जलद खेळी केली.
प्रत्युत्तर दिवपी बांगलादेश एकदाय हे मोखीच्या लागसार पावतलो अशें दिसूंक ना. ताच्यो थारावीक अंतरान विकेटी पडत गेल्यो. फक्त लिटन दासान सगल्यांत चड 34 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
