भांगरभूंय | प्रतिनिधी
दिवचलः दिवचल तशेंच हेर वाठारांनी फाटल्या दोन दिसां सावन उदकाचे पायपलायनीचें स्थलांतर आनी दुरुस्तीचें काम चालू आशिल्यान नळ सुके पडल्यात. उदका खातीर खूब जाणांक बांयो, व्हाळ, तशेंच टँकरांचो आदार घेवचो पडला.
दोन दीस उदका पुरवण जावची ना, अशी खात्यान नोटीस जारी केल्या. तशेंच दुरुस्तीकाम झुजा पांवड्याचेर चल्लां, अशें अधिकाऱ्यांनी सांगलें.
मजगतीं, आमदार डॉ. चंद्रकांत शेट्ये हे संबंदांत एकसारको नियाळ घेत आसात. तशेंच ताकतिकेन दुरुस्तीकाम पुराय करून उदका पुरवण सुरळीत जावची हे खातीर नेमान ते फाटपुरवण करतात, अशेंय अधिकाऱ्यांनी सांगलें. खूबशा वाठारांतली उदकाची पायपलायन पोरणी जाल्या, हे खातीर ती बदलपाची गरज आसा. कांय कडेन ती बदलपा खातीर मंजुरी मेळ्ळ्या, अशीय म्हायती तांणी दिली.
मजगती, थळावे नगरसेवक आनी कार्यकर्ते आपापल्या वाठारांतल्या लोकांक टँकरा वरवीं उदका पुरवण करताले. उदका पुरवण विभागान खूबशा वाठारांनी टँकरांतल्यान उदका पुरवण करची, अशी सुचोवणी आपणे अधिकाऱ्यांक दिल्या, अशें आमदार डॉ. शेट्ये हांणी सांगलें. शुक्रार मेलेन उदका पुरवण सुरळीत करपाचे विभागाचे यत्न आसात, अशें अधिकाऱ्यांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
