भांगरभूंय | प्रतिनिधी
भांगरभूंय । प्रतिनिधी
वाळपयः होंडा उद्देगीक वसणुकेंत आशिल्ल्या सुक्राप्ट पेपर मील कंपनीक लागून होंडा आनी आशिकुशीच्या वाठारांतल्या लोकांक प्रदूशणाक तोंड दिवचें पडटा. पंचायत मंडळान तें बेगोबेग थांबोवचें अशी मागणी होंडा पंचायतीच्या हालींच जाल्ले ग्रामसभेंत केली.
कंपनीतल्यान व्हडले आवाज तशेंच सोसपा जायना अशी घाण येता. ताचो पंचायतीचे सगळे वॉर्ड तशेंच हरवळें, मोर्ले हांगच्याय लोकांक त्रास जाता. घाणयाऱ्या वासांक लागून लोकांचे भलायकेचेर परिणाम जावपाची भिरात ग्रामसभेक हाजीर आशिल्ल्यानी उक्तायली. पेरप मिलांतल्या प्रदूशणाचो त्रास विद्यार्थ्यांक लेगीत जाता. हे कंपनीक लागून कांय बांयेतलें उदक दुशीत जालां अशी कागाळ पोस्तवाड्या वयल्या लोकांनी केली.
होंडा बाजारांत स्थलांतरींतानी दुकानां सुरू केल्यांत, ताचो परिणाम थळाव्या दुकानदाराचेर जावपाक लागला. पंचायत मंडळान गोंयां भायल्यांक दुकाना सुरू करपाक परवाने दिवचें न्हय अशी मागणी होंडा- तिस्क वाठारातल्या दुकानदारांनी केली.
होंडा पंचायतीचें काम फाटल्या कांय वर्सा सावन बसस्टॅण्डा कडले ल्हान कार्यालयांतल्यान चलता. लोकांची जाता ती गैरसोय पयस करपा खातीर नवे इमारतींत कार्यालय सुरू करपाची सूचोवणी ग्रामस्थांनी केली. सुरवेक सरपंच शिवदास माडकारान सगळ्याक येवकार दिलो आनी विचारल्ल्या प्रश्नांक जापो दिली. पेपर मील प्रदूशण बंद करपा खातीर जाय ते यत्न करपाचें आस्वासन तांणी दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
