भांगरभूंय | प्रतिनिधी
संवसारीक टी-20 क्रिकेट सर्तीच्या सुपर 12तली अ गटांतली न्युझिलॅण्ड आनी अफगाणिस्तान ह्या पंगडां मदली मॅच पावसाक लागून रद्द करची पडली.
मॅलबॉर्न क्रिकेट मैदानाचेर पावसाक लागून टॉस लेगीत जालो ना. मॅच रद्द जाल्ल्यान दोनूय पंगडां मदीं 1-1 गुणाची विभागणी जाली. पावसाक लागून अंदूंचे सर्तींतली रद्द जाल्ली ही दुसरी मॅच थारली. 24 ऑक्टोबराक ब गटांत दक्षीण आफ्रिका आनी झिम्बाब्वे ह्या पंगडां मदली मॅच लेगीत पावसाक लागून रद्द केल्ली.
न्युझिलॅण्डान आपले पयले मॅचींत येजमान पंगडाक 89 धांवड्यांनी हारयिल्लो, जाल्यार अफगाणिस्तानाक इंग्लंडा आड 5 विकेटींनी हार घेवची पडिल्ली. काल पावसाक लागून मॅच रद्द जाली आनी ताचो फायदो अफगाणिस्तानाक जालो. कांयच करिनासतना ताका एक गूण मेळ्ळो.
अ गटांत न्युझिलॅण्ड दोन मॅचींतल्यान तीन गूण घेवन पयले सुवातेर आसा. श्रीलंका दुसरे सुवातेर आसा. ताचे दोन गूण आसात. इंग्लंड तिसरे आनी आयर्लेण्ड एक जैता सयत चवथे सुवातेर आसा. येजमान ऑस्ट्रेलिया पांचवे आनी अफगाणिस्तान निमाणे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
