भांगरभूंय | प्रतिनिधी
भांगरभूंय । प्रतिनिधी
दिवचलः पुस्तकां वाचन कमी जायत चल्लां अश्या वेळार वाचन संस्कृती वाडोवपाचें काम भौशीक लायब्ररी करपाक लागल्यात अशें साहित्यीक विठ्ठल गांवस हांणी सांगलें. दिवचल तालुको लायब्ररींत आयोजीत केल्ल्या दिवाळी अंक प्रदर्शनाचें बुधवाराक उक्तावण केल्या उपरांत ते उलयताले.
सध्या सोशल मीडियाचेर जें कितें येता तेंच लोक वाचतात. पुस्तकां विकतीं घेवन वाचपाचें आता सामकें कमी जालां अशें गांवस हांणी सांगलें. प्रदर्शनात सुमार 150 दिवाळी अंक माडल्यात. प्रदर्शन सगळ्यां खातीर उक्तें आसा. पांच दिसां उपरांत हे दिवाळी अंक सभासदांक घरा व्हरून वाचपाक मेळटले अशें ग्रंथपाल तेजा परब हिणे सांगलें.
उक्तावण कार्यावळीक वाचक आनी लायब्ररी सभासद हाजीर आशिल्ले. ग्रंथपाल प्रगती पेडणेकारान सूत्रसंचालन करतना दिवाळी अंकांची समृद्ध परंपरा शंबर परस चड वर्सांची आसा अशें सांगलें. वेगवेगळे दिवाळी अंक एकेच सुवातेर वाचकांक वाचपाक मेळचे हे खातीर हें प्रदर्शन आयोजीत केलां अशें तिणे सांगलें. तें आयोजीत करपाक सिद्धी भजे, प्रतिमा धामसेकार, कृष्णा गांवस, स्मिता पाटील हांणी हातभार लायला. कार्यावळी उपरांत ग्रंथपाल मंगलदास घाडीन सगल्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
