भांगरभूंय | प्रतिनिधी
भांगरभूंय । प्रतिनिधी
फोंडेंः स्टार प्रवाह मराठी चॅनलाचेर सुरू आशिल्ल्या ‘सुख म्हणजे नक्की काय असते’ हे माळेंत गौरीची भूमिका करपी गिरिजा प्रभू ही दिवाळे निमतान आपल्या दाबाळच्या घरा आयिल्ले. ते निमतान दाबाळकारां वतीन राज्यसभा खासदार विनय तेंडुलकार हांचे हस्तुकीं तिचो भोवमान केलो. ह्या वेळार पंच वांगडी भोला ऊर्फ बारकेलो गांवकार, रमाकांत गांवकार, चेतन पाटील, शंकर पाटील, आतिश गांवकार आनी ग्रामस्थ हाजीर आशिल्ले.
गोंयच्या गांवगिऱ्या वाठारांतल्या जायत्या कलाकारांनी गोंयचें नांव वयर काडलां. फुडाराक नवे कलाकार घडोवपा खातीर दरेकल्यान यत्न करपाक जाय. दाबाळच्या गिरिजा प्रभून टीव्ही माळेंत काम करून बरे येस मेळयलां. तरणाट्या कलाकारांनी तिचे पसून देख घेवपाक जाय अशें विनय तेंडुलकार हाणे ह्या वेळार सांगलें.
गिरिजा प्रभून दाबाळ सारक्या गांवगिऱ्या वाठाराचें नांव उज्वल केलां. थळाव्या कलाकारांक उर्बां दिवपाचो यत्न केल्यार फुडाराक गोंय आनी महाराष्ट्राच्या पांवड्यार नांव काडपी कलाकार जावपाक शकतात, अशें रमाकांत गांवकारान सांगलें. गोंयांक कलाकारांची खण म्हणतात. सध्या हे खणीतली कला आटपाक लागल्या काय कितें, असो प्रश्न उप्रासपाक लागला. अशें जावपाक दिवपाक जायना अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
