भांगरभूंय | प्रतिनिधी
मंत्री सुभाष फळदेसायान केली पळोवणीः कंत्राटदाराक शिटकावणी
भांगरभूंय । प्रतिनिधी
दिवचलः मयें मतदारसंघांतल्या नार्वे गांवांत आशिल्ल्या इतिहासीक श्री सप्तकोटेश्वर देवळाच्या नुतनीकरणाचें काम कांसवाचे गतीन चल्ला. तें काम राज्य पुरातत्व खात्यान हातांत घेतलां. 2019 त ह्या कामाक सुरवात जाल्ली. मात अपेक्षे प्रमाण तें जावंक नाशिल्ल्याची खंत पुरातत्व खात्याचे मंत्री सुभाष फळदेसाय हांणी कामाची पळोवणी केले उपरांत उक्तायली. हया कामाचो पुराय अहवाल मागोवन घेतलों. कामाक गती दिवचे कातीर कंत्राटदाराची चवकशी करतलों, अशी शिटकावणी तांणी ह्या वेळार दिली.
मंत्री फळदेसाय हांणी नार्वेच्या श्री सप्तकोटेश्वर देवळाच्या कामाची पळोवणी करचे खातीर 21 ऑक्टोबराक भेट दिल्ली. ह्या वेळार तांचे वांगडा आमदार प्रेमेंद्र शेट, नार्वेचे सरपंच संदेश पार्सेकार, देवस्थान अध्यक्ष पृथ्वीराज सरदेसाय, सचीव राजाराम दिवकार, पुरातत्व खात्याचे अधिकारी आनी हेर मानेस्त हाजीर आशिल्ले.
ह्या देवळाचें काम जे गतीन जावपाक जाय आशिल्लें ते गतीन जावंक ना. इतिहासीक स्वरूप राखून जे तरेन छत्रपती शिवाजी महाराजांनी हें देवूळ बांदिल्लें, तशेंच काम कंत्राटदारान हातांत घेतलां. मात फाटल्या दोन वर्सां सावन फक्त दोन कामगारांक घेवन कंत्राटदार काम करता. जाचें कशेच तरेन समर्थन करपा जावचें ना. बांदकाम अजून पुराय जावंक नाशिल्ल्यान फुडलें वीज आनी हेर कामांक आडखळ जाल्या. ह्या अर्दवट कामा खातीर देवस्थानाच्या विवीध उत्सवांचेर परिणाम जाता. हाची गंभीर दखल घेवन कंत्राटदाराची चवकशी करतले, अशें मंत्री फळदेसाय हांणी सांगलें. ह्या देवळाचें काम बेगीन पुराय करचें, तशेंच ह्या कामाची पळोवणी करची, अशी आपणें मंत्री फळदेसाय हांचे कडेन मागणी केल्ली, अशें ह्या वेळार आमदार शेट हांणी सांगलें.
स म्हयन्यांत काम पुराय करपाचो यत्नः फळदेसाय
सप्तकोटेश्वर देवळाच्या कामा खातीर लागपी सगळो निधी पुरातत्व खात्यान भौशीक बांदकाम खात्या कडेन दिला. बांदकाम खात्यान हें काम नियोजीत वेळांत पुराय करपाक जाय आसिल्लें. मुख्यमंत्री डॉ. प्रमोद सावंत हांणी ह्या कामाचेर लक्ष दिवन एकदां कामाचो अहवाल मागयिल्लो. तरी लेगीत कामाक गती मेळूंक ना. आतां मेरेन फक्त 60 टक्केच काम जाला. उरिल्लें काम स म्हयन्यां भितर पुराय करून घेवपाचो आपूण यत्न करतलों, अशें मंत्री सुभीष फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
