नरकासूराचो वाद

भांगरभूंय | प्रतिनिधी

पालक भुरग्यांचेर लक्ष दवरपाक शकतात. पूण सगल्यांकूच हें शक्य जावचें ना. तेन्ना नरकासूर तयार करून तो लासता मेरेन तरणाट्यांनीच स्वताचेर नियंत्रण दवरचें पडटलें.

दरेका राज्यांत सण, परबो वेगवेगळे पद्दतीन मनयतात. आमच्या गोंयांत दिवाळेचे आदले दीस नरकासूर तयार करून रात जागयतात. 50 वर्सां पयलीं कांय वेंचिक शारां सोडलीं जाल्यार व्हडलेशे नरकासूर दिसनाशिल्ले. 1980 दशकाच्या दुसऱ्या अर्दांत नरकासूर सर्तींक नेट आयलो आनी खाची- कोनशांनी नरकासूर उबे रावपाक लागले. फाटल्या कांय वर्सांनी दरेका ल्हान वाड्यार, निवासी इमारतींनी पसून 4-4 नरकासूर दिसपाक लागल्यात. हाचेर दोन मतप्रवाह आसात. कांय जाणांक दिसता, ही प्रथा बंद जावची, तर थोड्यांक दिसता ती सुरू उरची. आतां हातूंत लोकप्रतिनिधी देंवल्यात. वीजमंत्री म्हणटात, नरकासूर जावपाक जायनात, तर पर्यटनमंत्र्याक तातूंत पर्यटन वयर काडपाची तांक आसा, अशें दिसपाक लागलां. राज्यांतले लोकूय ह्या प्रस्नाचेर विभागल्यात. मात, चडश्या भुरग्यांचो, तरणाट्यांचो नरकासूरांक पूर्ण तेंको आसा, हातूंत दुबाव ना.
नरकासूर सर्तीक विरोध करपी आनीक एक गट आसा. तांच्या म्हणण्याक मात कोण हरकत घेनात. तरणाट्यांक व्यसन लागता, तें दिवाळेच्या रातीं, अशें तांचें मत. नरकासूरा खातीर सगले रातभर जागतात आनी साहजिकूच चिकन, मटण, बियर, सोरो पियेवप जाता. अर्थांत सगलेच नशा करतात, अशें कोण म्हणचो ना. पूण, व्यसनांचो अभ्यास करप्यांचें मत, जायते तरणाटे नरकासूराचे रातीं पयले खेप पिवपाक शिकतात. सगल्या धर्मांचे रातभर जागपाचे सण वा दीस आसात, तेन्नाय कांयशें अशेंच घडटा, हे विशीं दुमत आसचें ना. पालक भुरग्यांचेर लक्ष दवरपाक शकतात. पूण, सगल्यांकूच हें शक्य जावचें ना. तेन्ना नरकासूर तयार करून तो लासता मेरेन संबंदीत तरणाट्यांनीच स्वताचेर नियंत्रण दवरचें पडटलें. कारण एकदा सोऱ्याची रुच (आतां ताचे परस भिरांकूळ ड्रग्स आसा.) लागली काय ती सोंपेपणी सुटना.
नरकासूराची प्रथा पाळपी कांय तरणाटे वा भुरगे फक्त उमेदी खातीर ती पाळटात. मजा, उत्साह हाचे पलतडी ते कसलो विचार करीनात. नाचत, गायत एक रात सारप इतलेंच तांचे तकलेंत आसता. तेन्ना नरकासूर बंद जायत अशें दिसना. एक गजाल मात जावं येता, सर्तींचो वाडटो आंकडो देवूं येता. पुरस्कर्ते मेळ्ळे नात, जाल्यार गांवांगांवांनी चलपी नरकासूर सर्ती उण्यो जावं येतात. राजकी फुडारीच ह्या सर्तींक दुडू दितात. नरकासूर करपाकूच 20 हजार ते 75 हजारां मेरेन देणग्यो दिवपी लोकप्रतिनिधी आसात. हाचो अर्थ गोंयांत नरकासूराच्या वाडिल्ल्या प्रस्थाक खुद्द फुडारीच जापसालदार आसात, अशें कोणी म्हणलें जाल्यार तें चुकीचें न्हय. तांणी दिल्लो कितलो पयसो नरकासूर नटोवपाचे खर्च जाता आनी कितलो खावपा- पिवपाचेर तें कळप कठीण. दुसरे वटेन, नरकासूर, सर्त आयोजीत करपाक, सर्तीचें इनाम म्हूण मेळिल्लो पयसो सांबाळपी क्लब आसात. उपरांत संस्कृतायेक बळगें दिवपी सर्ती, शिक्षणीक, भलायकेच्या कार्याचेर तो खर्च करपीय आसात. तेन्ना सरसकट सगल्यांकूच एकेच तागडेंत जोखप समा न्हय.
पर्यटनमंत्री म्हणटात, ते प्रमाण नरकासूराचो वापर करून पर्यटकांक आकर्शिक करप शक्य आसा. तशे आतां खूबशे पर्यटक येतातूय बी नरकासूर पळोवपाक. तरणाट्यांच्या कलागुणाक नरकासूर सर्तींक लागून वाव मेळटा. सध्या सर्तींनी येतात, ते नरकासूर तयार करप सोपें न्हय. फाल्यां ह्या तरणाट्यांच्या मदल्यान चित्रकार, शिल्पकार, नेपथ्य कलाकार मेळपाक शकतात, हेंय आमी विसरूंक फावना. नरकासूर प्रथा ही आदल्या आनी फुडाराच्या कलाकारांक उर्बा दिवपी आसा, हेंय तितलेंच खरें.
नरकासूराक लागून आवाजाचें प्रदूशण जाता, अशी कागाळ साबार वर्सां पयलीं सावन जायत आसा. ताचे आड कागाळी पसून जाल्यात. पूण सगलें आसा तशें अजून चलता. व्हडले स्पीकर, ताचेर वाजयिल्लीं इंग्लीश पदां… आशीकुशीच्या दुयेंतींक, जाण्ट्यांक, अर्भकांक जावपी हाचो त्रास. हाचे भायर मोनजात, सुकणीं आसात, तीं वेगळीं. नरकासूर लासले उपरांत रस्त्याचेर गोबोर, सरयो, खिळे आसतात. ताचोय त्रास गाडयेकारांक जाता. हाचेर नियंत्रण हाडूं येता. नरकासूर प्रथा गोंयकारांच्या शिरंतरांनी रिगल्या. तेन्ना ती सोंपेपणी बंद जावपाची ना. मात, हय तिका लागून समाजाक जावपी उपद्रव बऱ्याच प्रमाणांत उणो करूं येता.