भांगरभूंय | प्रतिनिधी
31 ऑक्टोबर मेरेन संप स्थगीत दवरपाचो निर्णय; कांय कर्मचाऱ्यां आड पुलिशेंत कागाळ
भांगरभूंय । प्रतिनिधी
म्हापशें: प्रलंबीत मागण्यो पुराय करून घेवचे खातीर शुक्रारा 21 ऑक्टोबराक म्हापशें पालिकेच्या कर्मचारी वर्गान बेमुजत कामबंद संपाचें हत्त्यार उबारलें. मात सांजे मेरेन कर्मचारी फाटीं सरले. हो संप 31 ऑक्टोबर मेरेन स्थगीत दवरता, अशी घोशणा पालिका कर्मचारी संघटणेचे फुडारी केशव प्रभू हांणी केली.
मजगतीं, पुराय दिसाचे घडामोडींत कायमस्वरुपी कर्मचारी वर्गान बोवाळ केल्ल्यान ह्या प्रकरणांत पालिका मुख्याधिकाऱ्यान कांय कर्मचाऱ्यां आड म्हापशें पुलिशेंत कागाळ केली आनी चवकशेची मागणी केली. ह्या वेळार कुचेली वाठारांतल्या म्हापशें पालिकेच्या एमआरएफ प्रकल्पा मुखार कोयर व्हरपी ट्रक प्रवेशदाराचेर मदींच आडवो घालून ट्रकाच्या टायरांतली हवा सोडली. ह्या प्रकल्पाक लागून शारांतल्या कोयर वेवस्थापनाचेर परिणाम जालो, अशें हे कागाळेंत मुख्याधिकाऱ्यान म्हणलां.
दनपारां जेवणा उपरांत पालिकेंतल्या स तात्पुरत्या कर्मचाऱ्यांक संपांत वांटेकार जावचे म्हूण ह्या संप करपी कर्मचाऱ्यांनी संबंदितांक कार्यालयांतल्यान भायर सरपाक लायले. ते भायर पालिका कार्यालया मुखा वयल्यान वचपी एका कोयर व्हरपी ट्रक चालकाक ह्या कर्मचाऱ्यांनी जाब विचारलो. ताका लागून कांय वेळ तणाव निर्माण जालो. ताका लागून म्हापशें पुलिशेक आपोवचे पडले.
मजगतीं, वैजकी भत्तो हो स हजार रुपयां आसा तो आठ हजार करचो हे मागणे सयत वट्ट 19 कलमी मागणीपत्राचे पूर्तते खातीर अखील गोंय पालिका कर्मचारी संघटणेन म्हापशें पालिकेक नोटीस जारी केल्ली. मात ही मागणी पालिका मंडळान पुराय करूंक नाशिल्ल्यान कर्मचारी वर्गान शुक्रारा संपाचेर वचपाचो निर्णय घेतिल्लो. हे संबंदांत युनियन कामगार फुडारी केशव प्रभू हांणी सांगलें, कामगारांच्या प्रस्ना संबंदांत मंगळारा स्थायी समिती मुखार विशय घेतले. ते उपरांत 31 ऑक्टोबराक पालिकेचे साबार बसकेंत हाचेर चर्चा जातली अशें आस्वासन म्हापशें पालिका मंडळान दिलां. तांचे विनवणेक मान दिवन आमी 31 ऑक्टोबर मेरेन हो संप स्थगीत दवरतात. ते उपरांत फुडलो निर्णय घेतले, अशें प्रभू हांणी सांगलें.
सांगून लेगीत कर्मचारी समजले नातः नगराध्यक्ष
कामगारांच्या मागणीपत्राचेर चर्चा करचे खातीर पालिका मंडळाची बसका आपयल्या. अशें सांगून लेगीत कर्मचाऱ्यांनी संप केलोच. मात, ह्या संपा वेळार तांणी बोवाळ केलो. कर्मचाऱ्यांच्या ह्या वागण्याक लागून कांय जाणां आड आमी पुलिशेंत कागाळ दाखल केल्या. पालिके मुखार अर्थीक प्रस्न आसून लेगीत 147 कायमस्वरुपी कर्मचाऱ्यांक बिरेस्तारा स हजार रुपयांचो बोनस दिलो. इतले करून लेगीत ते अशे तरेन वागले, अशी प्रतिक्रिया नगराध्यक्ष शुभांगा वायंगणकार हांणी दिली.
बाजारांत जाल्यो कोयराच्यो राशी
म्हापशें कर्मचाऱ्यांनी संप केल्ल्यान सकाळच्या वेळार म्हापशें भाजी मार्केट तशेंच बाजारपेठेंत कांय कडेन कोयराच्यो राशी जाल्ल्यो. तशेंच हेर रस्त्यांचेरूय कोयर तसोच पडून आशिल्लो. उपरांत तो म्हापशें पालिकेन दिसवड्या वयल्या कामगारां कडल्यान काडलो. संप मोडून काडचे खातीर पालिका मुख्याधिकाऱ्यान नेटाचे यत्न केले. पुलिशेंत कागाळ करून कर्मचारी संघटणेचे अध्यक्ष शिवाजी कांबळी हांकां पुलिशे वतीन ताब्यांत घेवपाचो यत्न केलो. पूण सगल्या कर्मचाऱ्यांच्या विरोधाक लागून पुलीस परतून गेले. दिसवड्या वयल्या कर्मचाऱ्यांक कामा वयल्यान काडून उडोवपाची नोटीस जारी करून तांकां धमकावन कामाचेर येवपाक लायले. तरी लेगीत कर्मचाऱ्यांनी संप चालूच दवरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
