भांगरभूंय | प्रतिनिधी
भांगरभूंय ।प्रतिनिधी
वास्कोः वेर्णा हांगच्या म्हाळसा नारायणी देवळाच्या आवाठांत अध्यात्मीक पर्यटनाक वाव दिवपा खातीर अत्याधुनीक संग्रहालय उबारपाचो सरकाराचो विचार आसा अशें पुरातत्व खात्याचो मंत्री सुभा, फळदेसाय हांणी शुक्राराक सांगलें. ते खातीर तांणी म्हाळसा देवस्थान समिती आनी देवस्थान ट्रस्टा कडेन उलोवणी केल्यांत.
म्हाळसा देवस्थान आवाठांत आध्यात्मीक संग्रहालय उबारपाची कल्पना देवस्थान समितीक सांगल्ली. ताणी संग्रहालयाचो तपशील आनी ते खातीर येवपी खर्चा विशीं चर्चा करपाक म्हाका आपयल्ले अशें फळदेसाय हांणी पत्रकारांक सांगलें. गोंयांतलीं देवळां आनी देवाच्यो मूर्ती आमच्या समृद्ध आध्यात्मीक परंपरेची गवाय दितात. वेर्णा ही म्हाळसा देवीचें मूळ सुवात आशिल्ली. थंयची देवीची मूर्ती म्हाड्डोळा व्हरून स्थापन केल्ली. मूळ सुवातेर भव्य देवूळ बांदपाचें काम म्हाळसा देवस्थान ट्रस्टान करून दाखयलां. सरकारान देवळांत वचपा खातीर रस्ते आनी हेर सुविधा उपलब्द करून दिल्या. आध्यात्मीक पर्यटनाक वाव मेळचो हे खातीर संग्रहालय बांदपाची म्हाळसा देवूळ वाठार ही एक बरी सुवात आसा, अशें फळदेसाय हांणी सांगलें.
संग्रहालयाचो आराखडो तयार आसा. गोंयांत वेगवेगळ्या सुवातांनी मेळिल्ल्यो पोरण्या तेपा वयल्यो मूर्ती ह्या संग्रहालयांत दवोरून गोंयच्या समृद्ध अशे सांस्कृतीक परंपरेची म्हायती पर्यटकांक दिवप तशेंच पोर्तुगीज राजवट तें आर्विल्ल्या काळांतल्या गोंयच्या इतिहासाची म्हायती दिवन आध्यात्मीक पर्यटनाका कडेन पर्यटकांक आकर्शीत करपाचो सरकाराचो हेत आसा अशें फळदेसाय हांणी सांगलें. पुर्तुगेजांनी ना नपयत केल्ल्या गोंयांतल्या देवळांचो इतिहास लेगीत संग्रहालयांत मांडटले अशें तांणी सांगलें.
वेर्णा उबारतलें तें संग्रहालय अत्याधुनीक आसतलें. राज्यांतल्या वेगवेगळ्या वाठारांनी मेळिल्ल्यो दायज म्हत्व आशिल्ल्यो मूर्ती आनी हेर दस्तावेज ह्या संग्रहालयांत दवरतले. आमचो पुरातन म्हत्वाचो दस्तावेज आनी सांस्कृतीक म्हत्वाच्यो वस्तू पोर्तुगालच्यान परत हाडपाचो आमचो यत्न आसा. पोर्तुगालांत वचून संशोधन केल्ल्यांक तशेंच पोर्तुगालच्या संग्रहालयांनी वचून आयिल्ल्या लोकांक आमी मेळटले. पोर्तुगालांत खंय खंय आमचे पुरातन दायज वस्तू आसात हाची म्हायती तांचे कडल्यान घेवन फुडले सोपस्कार करतले अशें फळदेसाय हांणी सांगलें.
गोंयांत आशिल्ल्या पुरातन किल्ल्यांचें संवर्धन करपाचें काम सरकारान हातांत घेतला. शंबर वर्सां परच चड तेपाच्या धार्मिक थळांचो जीर्णोद्धार करून तांची पुरातत्व संरक्षीत थळ म्हणून राखण करतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
