भांगरभूंय | प्रतिनिधी
भांगरभूंय । प्रतिनिधी
पर्वरीः कमी वजनाचे गॅस सिलिंडर विकतात अशी खबर मेळिल्ल्यान सहाय्यक नियंत्रक ए एन पंचवाडकार हांच्या मार्गदर्शना खाला लिगल मिटेरोलॉजीच्या अधिकाऱ्यांनी पैठण- पर्वरी हांगच्या हिंदुस्तान पॅट्रोलियमाच्या तळकार एजन्सीचेर छापो घालून ट्रकांत विकपाक हाडिल्ले 33 घरगुती गॅस सिलिंडर जप्त केले. ताचें वजन केलें तेन्ना तांतूंत एक तें अडेज किलो कमी गॅस आशिल्ल्याचें दिसून आयलें.
दक्षीण गोंयांत बेंतालभाटी हांगा घातिल्ल्या छाप्या वेळार कमी वजनाचे 17 सिलिंडर मेळिल्ले. पर्वरी कमी वजनाचे सिलिंडर विकतात अशी आमकां म्हायती मेळिल्ल्यान आमी हो छापो घातलो अशें पंचवाडकार हांणी सांगलें. सिलिंडराच्या ट्रकांत 51 सिलिंडर आशिल्ले. तांचें वजन केलें तेन्ना 33 सिलिंडरांत कमी गॅस आशिल्ल्याचें दिसून आयलें. दरेका सिलिंडरांत 14.2 किलोग्राम गॅस आसपाक जाय. मात तळेकार दिता त्या सिलिंडरांत उणो गॅस आशिल्लो. हिंदुस्तान पॅट्रोलियमाचे फॅक्टरींत सिलिंडरांत कमी गॅस भरपाची शक्यताय ना अशें तांणी सांगलें.
गॅस सिलिंडरांत 150 ग्राम गॅस चड वा उणो आसपाक शकता. मात एक ते अडेज कील गॅस उणो मेळप म्हणल्यार सिलिंडरांतल्यान गॅस काडून तो दुसऱ्या सिलिंडरांनी भरपाचें काम चलतां हें स्पश्ट जालें. ट्रकांत आमका सिलिंडरांतलो गॅस दुसऱ्या सिलिंडरांत घालपाचे पायप तशेंच वजनाचो काटो मेळ्ळो अशी म्हायती तांणे दिली. जप्त केल्ले 33 सिलिंडर आमी आमच्या ताब्यांत घेतल्यात. हिंदुस्तान पॅट्रोलियम कंपनीक आमी ताची म्हायती दिल्या. सिलिंडरांचे सील तपासून आमकां अहवाल सादर करपाक आमी कंपनीक सांगला. तांचो अहवाल आयले उपरांत तळकार एजन्सीचेर कायदेशीर कारवाय करतले अशें सागून एजन्सीवाले सिलिंडराचें वजन करपाक न्हयकार दितात जाल्यार 241643 ह्या फोन नंबरा वयल्यान लिगल मिटेरोलॉजीक कळीत करपाचें आवाहन पंचवाडकार हांणी सांबार लोकांक केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
