भांगरभूंय | प्रतिनिधी
उदरगतीचीं कामां करतलो जाल्यार संबंदीत सरकाराक चडांत चड पयसो जाय. सरकार तो लोकांचेर, कंपन्यांचेर, दुकानांचेर, विवीध सेवांचेर कर म्हणल्यार टॅक्स लावन उबो करता. कांय वेळार गरज नासतना चड टॅक्स लायतात. मागीर लोक चार दीस आरड मारतात आनी ओगी रावतात. म्हारगाय वाडपाक कांय वेळार हे टॅक्सूच जापसालदार आसतात. टॅक्स भरिना जाल्यार सरकार दंड दिता. मालमत्ता जप्त करता, बंदखणीची ख्यास्त पसून जाता. पूण आमी हुशार, वर्साचीं वर्सां टॅक्स, बिलां भरिनासतना सरकाराक वेवस्थित फटयतात. आतां असल्या लोकां आड गोंय सरकारान पावलां उखलपाचें थारायलां. टॅक्स भरीनात त्या लोकांक कसलेच दाखले दिवं नाकात, असो उलो पंचायतमंत्री माविन गुदिन्यान पंचायतींक मारला. अर्थांत हाची कितली परिणामकारक अंमलबजावणी जातली, तें आतांच सांगप कठीण. कारण करबुडोवपी लोक हे खूब हुशार आसात आनी पं. नेहरुच्या वेळा सावन ते देशाक फटयत आयल्यात.
पंचायतींनी घरपट्टी सावन वेपारी टॅक्सा मेरेन साबार तरांचे कर आसतात. मात सगलेच लोक ते भरताच अशें ना. हाका फक्त आनी फक्त लोकूच जापसालदार असो एक समज आसा. कांय प्रमाणांत खरें तें. तरीय दुसरी बाजू पळयत जाल्यार सरकारी प्रशासन, स्वराज्य संस्था तितल्योच वा लोकां परस कूसभर चडूच जापसालदार आसात, हें मान्य करचेंच पडटलें. पालिकांचीं मार्केटां आसात, तातूंतलीं लायटीचीं बिलां वर्साचीं वर्सां भरप ना, कोयर उखलपाचे पयशे दिवप ना, वेपारी कर भरप ना, भाडें फारीक करप ना….. असले प्रकार आमच्या गोंयांत जाल्यात. ह्या गुन्यांवाचो बुडकुलो कोणाच्या माथ्यार फोडपाचो? जर पालिकेचो वा सरकारी खात्याचो वसुली कर्मचारी म्हयन्याच्या म्हयने आपलें काम करीना जाल्यार बिलां, टॅक्स तुंबतलेच. थकिल्लें कर वसुल करूं नाकात? कांय कडेन मागीर प्रशासन अभिनव पद्दत चालीक लायता. एक रकमी परतफेड!! म्हणल्यार 1 लाखांचो टॅक्स उरला जाल्यार 90 हजार भरप. उरिल्लो माफ. चुकीला माफी नाही, असो एक डाॅयलाॅग सिनेमांत आसा. मात हांगा चुकांक माफीचेर माफी! हाका लागून सरकाराची येणावळ बुडटा. उदरगतीचीं कामां करपाक मेळनात. ताचे वायट परिणाम लोकांकूच सोंसचे पडटात.
कर फारीक करीनात तांकां कसलोच दाखलो दिवचो न्हय, अशें आवाहन पंचायत मंत्री गुदिन्य हांणी केलां. पूण, जर संबंदीतान करांचेर (हात) ल्हवूच पाचवी नोट दवरली जाल्यार अस्तित्वांत नाशिल्लो पसून दाखलो मेळटा. बोगस शिक्षण प्रमाणपत्रां पसून बनावट परवान्या मेरेन सगलें कितें आमच्या देशांत उपलब्ध आसा. फट दिसता जाल्यार पैसा फेको, तमाशा देखो. पंचायतींक उदरगत करपाची आसा, जाल्यार करांतल्यान मेळिल्लो पयसो वाडपाक जाय. दुसरो अर्थ, कर बुडोवपी लोकांनी प्रामाणीकपणान टॅक्स भरूंक जाय. मात आमकां सगलें फुकटांत जाय. मागीर कर भरचो तरी कोणे? अशे वागपीच लोक मागीर हड्डें फुडें काडून सत्तेर आशिल्ल्या सगल्याच सरकारांचेर खर टिका करतात.
सरकारान साबार तरांचे नवे कर लागू केल्यात. कांय जाणांक तें खबर पसून नात. संबंदीत सेवा घेवपाक वा तिचें शुल्क फारीक करपाक गेलो काय मागीर अचकीत तें कळटा. तिजोरी भरपाक सरकार करांचे (टॅक्स) बाबतींत हातचलाखी करता, ती सुशिक्षीत मनशाचे पसून नदरेक येना. कोणा जाणकाराक तें कळ्ळेंच जाल्यार ताका पिसो थारावप वा ताचें तोंड बंद करप. कांय करांची रक्कम चड आशिल्ल्यान मागीर तो मुखार दिसलो काय करदातो ल्हवूच तोंड लिपोवन फुज्जो काडटात. 191 पंचायतींनी टॅक्स थकिल्ले आसात. वाडून तांची रक्कम कोटींच्या घरांत गेल्ली आसतली. पंचायतींनी खास उपाय घेवन ही रक्कम भरपाक संबंदीतांक फोर्सार करपाक जाय. एक रकमी भरता जाल्यार करमाफी मात दिवची न्हय, कारण हो प्रामाणीक करदात्यांचेर अन्याय. कायदो पाळून सरकार सांगतां तें फारीक करपी लोक आसात आनी तेच बाराबर सरकारान सांगून पसून काना भायरें करपी लोक
आसात. विशेश म्हणल्यार मनमानी वागपीच सत्ताधिशांक, संबंदीत प्रशासनाक चड लागींचे आसतात. मुद्दाम तपासून पळयात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
