मडगांवकरांनी भिवपाची गरज ना

भांगरभूंय | प्रतिनिधी

मुख्यमंत्रीः मडगांवचे पयलीं फातोड्डेंचो कोयर काडटले

भांगरभूंय । प्रतिनिधी

मडगांव: मडगांवचे आमदार दिगंबर कामत मडगांवचे उदरगती खातीर वावुरतात. फाटलीं कांय वर्सां ते विरोधी पक्षांत आशिल्ले. ताका लागून मडगांवची उदरगत जशी जावपाक जाय आशिल्ली तशी जावंक ना. हाचे मुखार मडगांवची उदरगत जातली, कोणेच भिवपाची गरज ना. आपूण मडगांवचे आमदार दिगंबर कामत आनी मडगांवच्या लोकांक मडगांव शार नितळ करून मॉडेल मडगांव करतलों, अशें आस्वासन तांणी दिलें. तशेंच

मडगांवच्या पयलीं फातोड्डें मतदारसंघांतलो कोयर काडटले, अशें तांणी सांगलें. मडगांवच्या दैवज्ञ भवनांत आयोजीत भाजपाच्या मेळाव्यांत ते उलयताले. 

ह्या वेळार माचयेर भाजपा प्रदेशाध्यक्ष सदानंद शेट तानावडे, मडगांवचे आमदार दिगंबर कामत, नगराध्यक्ष दामोदर शिरोडकार, मडगांव भाजपा मंडळाचे अध्यक्ष रुपेश महात्मे, भाजपाचे प्रदेश सरचिटणीस दामोदर नायक, ॲड. नरेंद्र सावयकार, आदले उपमुख्यमंत्री मनोहर आजगांवकर, भाजपाचे दक्षीण गोंय अध्यक्ष तुळशीदास नायक, भाजपाचे दक्षीण गोंय प्रभारी सर्वानंद भगत हाजीर आशिल्ले. 

प्रधानमंत्री नरेंद्र मोदी जातीभेद करिनासतना सगळ्या घटकांची उदरगत करतात. काश्मीर ते कन्याकुमारी मेरेन सरकार खंयच्या पक्षाचें आसा तें पळय नासताना उदरगतीक प्राधान्य दितात, अशें मुख्यमंत्री डॉ. सावंत हांणी सांगलें. 

मडगांवचे आमदार दिगंबर कामत हांणी वेंचणुके आदीं भाजपांत प्रवेश केल्लो जाल्यार फातोड्डें मतदारसंघांत वेगळो निकाल लागपाचो. कामत हांणी भाजपांत प्रवेश केल्यान दक्षीण गोंयांत भाजप घटमूट जातली. आमदार कामत हांणी आपल्या कार्यकत्यांक विस्वासांत घेवन भाजपांत प्रवेश केला. मोदी हांच्या फुडारपणाक लागून देशाचो अभिमान वाडला. फुडल्या काळांत भारत निश्चीत महासत्ता जातलो, असो विस्वास मुख्यमंत्री डॉ. सावंत हांणी उक्तायलो.  हे कार्यावळींत सुमार 2500 कार्यकर्त्यांनी गोपाळ नायक हांच्या फुडारपणा खाला भाजपांत प्रवेश केलो.