भांगरभूंय | प्रतिनिधी
गोंय काजू उत्पादक संघटणाः उणाक दर्जाचे काजू विकून पर्यटकांची फटवणूक
भांगरभूंय । प्रतिनिधी
दिवचलः गोंयच्या दर्यादेग वाठारांनी गोंयचे रुचीक काजू म्हूण बेकायदो विक्री चल्ल्या. तांचे कडेन कसलेच परवाने नात वा ते कसलेच तरेचो कर भरिनात. गोंयचे उच्च दर्जाचे काजू म्हूण ते पर्यटकांक उणाक दर्जाचे काजू विकून पर्यटकांक फटयतात. हे संबंदान गोंय काजू उत्पादक संघटणेन रितसर कागाळ केल्या आनी हे संबंदांत कारवाय करपाची मागणी केल्या.
संघटणेचे अध्यक्ष युवा उद्देजक रोहीत झांट्ये हांणी हे संबंदांत म्हायती दितना सांगलें, गोंयांत व्हड प्रमाणांत पर्यटक येतात. तांकां गोंयचे रुचीक काजू जाय आसता. हाचोच फायदो घेवन कांय विक्रेते राज्या भायले उणाक दर्ज्याचे काजू विकून ते गोंयचे अशें सांगून तांची फटवणूक करतात. ह्या वेवसाया खातीर तांचे कडेन कसलोच परवानो आसतना वा ते जीएसटी लेगीत भरिनात. ह्या विक्रेत्यांचेर ताकतिकेन कारवाय करची अशी मागणी संघटणे वतीन केल्या.
अशा बेकायदो प्रकाराक लागून मूळ गोंयच्या काजू उत्पादकांचेर वायट परिणाम जाता. आमी सगळ्यो कायदेशीर गजालींक पाळो दिवन वेवसाय करतात. कांय विक्रेते बागा, हणजूणें, कळंगूट, कोलवें ह्या सारकिल्ल्या दर्यादेग वाठारांनी गोंया भायले उणाक दर्जाचे काजू गोंयचे म्हूण विकतात. विशेश म्हणल्यार दर्यादेग वाठारांत जें कांय दुकानकार उणाक दर्जाचे काजू विकतात तांचे कडेन अधिकृत एफडीएचो परवानो ना वा जीएसटी क्रमांक लेगीत ना. तशेंच तांचे कडेन कसलेच तरेचें अधिकृत ब्रँडींग ना. तेचवरी काजू विकतना कांय दुकानकार वजनाचे बाबतींतूय पर्यटकांक फटयतात, अशें झांट्ये हांणी म्हणलां.
उणाक दर्जाचे काजू भलायकेक घातक थारूं येता. उणाक दर्जाचे उत्पादन विकलें जाल्यार 25 हजार रुपयांचो दंड आसा. हो दंड घातलो जाल्यार तो खुबूच उणो आशिल्ल्यान ते तो भरतात आनी परतून तोच बेकायदो वेवसाय सुरू करतात. बेकायदो वेवसाय करप्यांचेर सरकारी यंत्रणेन ताकतिकेन कारवाय करपाची गरज आसा, अशें झांट्ये हांणी सांगलें.
6 ऑक्टोबराक गोवा काजू उत्पादन संघटणेच्या सुमार 15 उत्पादक आनी प्रक्रिया धारकांनी जीएसटी आयुक्तांक पत्र बरोवन जे कर चोरी करतात तांचेर कारवाय करपाची मागणी केल्ली. चडशा दुकानांनी जीएसटी नोंदणी ना, कांय नोंदणी केल्ली आसात, पूण ते वर्सुकी हिशोब दवरिनात. तशेंच काजू विकतना 12 ते 18 टक्के जीएसटी आसतना ते फक्त 5 टक्के जीएसटी लायतात, अशेंय कागाळेंत म्हणलां.
दर्यादेग वाठारांतले कांय दुकानकार कर्नाटक, महाराष्ट्र, ओडिसा, तामीळनाडू वाठारांतल्यान कायदेशीर बिलींग करिनासतना उणाक दर्जाचे काजू खरेदी करतात आनी ते गोंयचे म्हूण विकतात. संबंदीत यंत्रणेन ह्या दुकानकारांचेर बारीक नदर दवरून तांचेर कारवाय करपाची गरज आसा. बेकायदो वेवसाया खातीर वजन माप खातें, एफडीए, जीएसटी विभाग हांणी एकवटींत लक्ष दवरून बेकायदो प्रकार आळाबंदा हाडचे, अशी मागणी संघटणे वतीन केल्या.
रोजगारांचेर हावळ येवपाची शक्यताय…
अधिकृत नोंदणी अशिल्ल्या काजू विक्रेत्यांचेर हे बेकायदो विक्रीक लागून वायट परिणाम जाला. हे अधिकृत उत्पादक व्हड प्रमाणांत रोजगार दितात. ते खातीर तांच्या वेवसायाचेर परिणाम जालो जाल्यार खूबशा जाणांच्या रोजगारांचेर हावळ येवपाक शकता, अशें गोंय काजू उत्पादक संघटणेन पत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
