घुंवळे वखदांचें सेवन म्हळ्यार मानसीक दुयेंस

भांगरभूंय | प्रतिनिधी

जिवबा दळवी: संत सोहिरोबानाथ आंबिये म्हाविद्यालयांत घुंवळे वखदांचेर जागृताय

कोरगांव : तुमची जीण सोबीत आसा. ही फकत एकदांच मेळटा. ड्रग्सा पसून पयस रावून आपली जीण सोबीत करात. भलायकेक म्हत्व दिवचें, व्यायाम करचो, खेळ खेळचे पूण घुंवळे वखदांनी रमचें न्हय. घुंवळे वखदांचें सेवन म्हळ्यार मानसीक दुयेंस. घुंवळे वखदां घेवपी पिशे आसतात. हाचो वायट परिणाम त्या व्यक्तीच्या आयुश्याचेरूच न्हय तर ताच्या कुटूंबाचेर आनी समाजाचरूय जाता, अशें उप अधीक्षक जिवबा दळवी हांणी सांगलें. 

विर्नोडा पेडणें हांगच्या संत सोहिरोबानाथ आंबिये म्हाविद्यालयांत घुंवळे वखदां विशयाचेर जनजागृताय कार्यावळ जाली. हे कार्यावळीक दळवी विद्यार्थ्यांक म्हायती दितना उलयताले. ह्या वेळार माचयेर म्हापशेंचे उप अधीक्षक जिवबा दळवी, कोलवाळ पुलीस स्टेशनाचे निरिक्षक सोमनाथ माज्जी, पेडणें पुलीस स्टेशनाचे निरिक्षक दत्ताराम राऊत तशेंच म्हाविद्यालयाचे प्राध्यापक आनंद कोळंबकार, प्राध्यापक सतीश सावळ हजर आशिल्ले. 

हे पिरायेर बरें शिक्षण घेयात. ही पिराय करियर घडोवपाची. हे पिरायेर घुंवळे वखदांच्या नादांत लागूं नाका. समाजांत एक आदर्श व्यक्ती जायात. अन्याया आड लढात. वायट प्रकार नदरेक पडल्यार आमकां पुलिसांक कळयात. आमी मेळून घुंवळे वखदां आड लढुया, अशें पेडणें पुलीस निरीक्षक दत्ताराम राऊत हांणी सांगलें.

सुरवातेक सगळ्या मानेस्तांक येवकार आनी तांची वळख करून दिली. उपरांत ‘से नो टू ड्रग्स’ ह्या विशयाचेर जागृताय करतना उप अधीक्षक जिवबा दळवी हांणी हजर आशिल्ल्या विद्यार्थ्यांक ‘आयचे तरणाटे कशे तरेन घुंवळे वखदांचे सुवादीन वतात आनी तांकां कितल्या संकश्टांक तोंड दिवचें पडटा’ हाचेर विद्यार्थ्यांक चित्रपट दाखयले. 

कोलवाळ पुलीस स्टेशनाचे निरिक्षक सोमनाथ माज्जी हांणी, पिपिटी वरवीं खंयच्या वाठारांत घुंवळे वखदां सांपडटात, घुंवळे वखदांचे प्रकार आनी अशे घुंवळे वखदांचे गुन्यांव दाखल केल्या उपरांत कितें दंड दितात अश्या विवीध विशयांचेर मार्गदर्शन केलें. 

ह्या वेळार उप अधीक्षक जिवबा दळवी हांणी म्हाविद्यालयांतल्या विद्यार्थ्यांनी केल्ल्या प्रस्नांच्यो योग्य जापो दिवन तांचे दुबाव पयस केले. कार्यावळीचें सुत्रसंचालन आनी उपकार प्राध्यापक सान ब्रिगांझा हांणी मानले.