भांगरभूंय | प्रतिनिधी
ऑस्ट्रेलियेंत जावपी संवसारीक टी-20 सर्ती खातीर फास्ट बॉलर जसप्रीत बुमराचे सुवातेर मोहम्मद शमीची भारताच्या पंगडांत निवड केल्या. फाटींचे दुखापतीक लागून बुमरा पुर्ण संवसारीक सर्त चुकतली.
ऑस्ट्रेलियेंतल्यो खेळपट्ट्यो फास्ट बॉलरांक अनुकूल आशिल्ल्यान शमीची निवड केल्या अशें अशें भारतीय क्रिकेट नियामक मंडळान स्पश्ट केलें. शमी खेरीत मोहम्मद सिराजाक लेगीत संवसारीक टी-20 सर्ती खातीर भारताच्या पंगडांत सुवात दिल्या. पूण, तो राखीव खेळगड्याच्या रुपान ऑस्ट्रेलियेंत वतलो. हालींच सोंपिल्ले दक्षीण आफ्रिके आडचे वन डे माळेंत सिराजान उत्कृश्ट बॉलींग घाल्ली. डॅथ ओव्हरींनी सिराजा आड खेळप बॅट्समनांक खूब कठीण जाता. ताकाच लागून ताका पंगडांत सुवात मेळ्ळ्या.
संवसारीक टी-20 सर्ती खातीर पंगडाची घोशणा केल्या सावन टीम इंडियाचें टॅन्शन वाडत आसा. पयलीं रवींद्र जडेजा दुखापतीक लागून पंगडांतल्यान भायर पडलो. उपरांत दीपक हुड्डाक दुखापत जाली. ताका लागून दीपकाक दक्षीण आफ्रिके आडची टी-20 माळ लेगीत चुकली. आतां जसप्रीत बुमरा नाशिल्ल्यान भारताची समस्या वाडल्या.
मोहम्मद शमी टी-20तली आपली निमाणी मॅच पोरूं संवसारीक टी-20 सर्तींत नामिबिया आड खेळिल्लो. पूण, अंदूंचे आयपीएलांत ताणें उत्कृश्ट प्रदर्शन केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
