भांगरभूंय | प्रतिनिधी
भांगरभूंय । प्रतिनिधी
कोरगांवः मांद्रे पंचायत वाठारांत आशिल्ले कावलांचे अड्डे काडपा खातीर पंचायत मंडळान मोहीम हातांत घेतल्या. पंचायत वाठारांत चार अड्डे आसात. ते बंद कपाची नोटीस पंचायत मंडळान तांच्या धनयांक दिली आनी ते खाती धा दिसांची मुजत दिल्ली. सरपंच अमीत सावंत आनी सचीव अमीत प्रभू हांणी स्वता वचून ही नोटीस दिल्ली
कावल अड्डे आनी तांचे खातीर उबारिल्लो शेडी काडपा खातीर दिल्ली मुजत सोपले उपरांत सरपंच सावंत हांणी शुक्राराक वचून तांची पळोवणी केली तेन्ना अड्डे बंद केल्यात अशें दिसून आयलें. ह्या कावल अड्ड्यांच्या वेव्हारा खाला बेकायदेशीर वेव्हार चलतात अश्या कागाळी येवपाक लागल्ल्यान पंचायत मंडळान धडक कारवाय करून हे अड्डे बंद करपाची मागणी लोकांनी केल्ली.
बेकायदेशीर अड्डे तशेंच हेर व्यवसाय आपूण बंद करतलो. पंचायत वाठारांत जे स्थलांतरीत लोक रावतात तांका आपूण खंयचो, खंय रावता आनी कसलें काम करतात हाची म्हायती पंचायत मंडळाक दिवची पडटली, ना जाल्यार ताचेर खर कारवाय करतले अशें सरपंच सावंत हांणी सांगलें. गुन्यावगिरी थांबोवपा खातीर पंचायत वाठारांतल्या लोकांनी पंचायत मंडळाक सहकार्य करपाचो उलो तांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
