भांगरभूंय | प्रतिनिधी
संवसारीक अॅथलेटिक्साचे अॅथलेटिक्स इंटिग्रिटी युनिटान (एआययू) भारताची डिस्कस थ्रो खेळगडी कमलप्रीत कौर हिचेर तीन वर्सांची बंदी घाल्या.
ऑलिम्पिकांत भारताचें प्रतिनिधित्व करपी कमलप्रीत विशींचो हो निर्णय एआययून काल ट्वीट करून सांगलो.
पंजाबचे 26 वर्सां पिरायेचे कौरच्या नमुन्यांत प्रतिबंधीत स्टॅनोजोलोल द्रव्य सांपडिल्लें. ताका लागून तिचेर तीन वर्सांची बंदी घाल्या. एआययून आपल्या अहवालांत सांगलें, कौराचे नमुने अंदूं 7 मार्चाक पटियालांत घेतिल्ले. ते उपरांत हे नमुने तपासणी खातीर धाडिल्ले.
कमलप्रीत कौरा वयली ही तीन वर्सांची बंदी 29 मार्च 2022 पसून सुरू जाल्या. आतां फुडल्या तीन वर्सां मेरेन कौराक खंयचेच सर्तींत वांटो घेवपाक मेळचो ना. तशेंच कौरान 7 मार्चा उपरांत जर खंयचे सर्तींत वांटो घेतिल्लो तर त्याचो निर्णय मान्य जावचो ना. कौरान 29 मार्चाक एआययून तात्पुर्ती निलंबीत केल्ली.
तिणें फेब्रुवारी म्हयन्यांत दोन प्रोटीन सप्लीमॅण्टाचे दोन चमचे घेतिल्ले अशें कौराचे चांचणेंत सांपडलें. हातूंत स्टॅनोजोलोलाचो अंश सांपडिल्लो.
कमलप्रीत कौरान टोकियो ऑलिम्पिकांत भारताचें प्रतिनिधित्व केल्लें. तिणें पात्रताय फेरयेंत 64 मिटराचो सर्वोत्कृश्ठ डिस्कस थ्रो केल्लो. 31 खेळगड्यां मदीं ती दुसरे सुवातेर आशिल्ली.
फायनलींत तिच्या कडल्यान पदकाची आस्त आशिल्ली. पूण, पात्रताय फेरयेंतलें जबरदस्त प्रदर्शनाची पुनरावृत्ती निमाणे फेरयेंत करपाक जमूंक नाशिल्ली. तिणें 63.7 मिटर सर्वोत्कृश्ठ डिस्कस थ्रो केल्लो. ह्या प्रदर्शना वरवीं ती सवे सुवातेर उरिल्ली. कोराची वैयक्तीक सर्वोत्कृश्ठ कामगिरी 66.59 मिटर इतकी आशिल्ली. तिणें अशीच कामगिरी टोकियो ऑलिम्पिकांत केल्ली जाल्यार तिका कांश्या पदक जिखप शक्य आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
