भांगरभूंय | प्रतिनिधी
दाबोळी विमानतळार गोवा मायल्सा खातीर कावंटर
युनायटेड टॅक्सीमेन असोसिएशनान स्वताचो अॅप तयार करचो
वास्को: हळडुव्या काळ्या टॅक्सीकारांच्या युनायटेड टॅक्सीमेन असोसिएशनान अॅप आदारीत गोवा मायल्स टॅक्सी सेवेक विरोध करचो न्हय. येता त्या दोन दिसां भितर दाबोळी विमानतळार गोवा मायल्सा खातीर कावंटर दितले. युनायटेड टॅक्सीमेन असोसिएशनान आपलो स्वताचो अॅप तयार करचो. नव्या तंत्रज्ञानाचो उपेग करचो. जेणे करून प्रवाशांक बरी सेवा मेळटली. तशेंच संबंदीत टॅक्सीकारांक वेवसाय मेळटलो अशें येरादारी मंत्री आनी दाबोळीचे आमदार मॉवीन गुदिन्हो हांणी सांगलें.
हळडुव्या काळ्या टॅक्सीकारांच्या युनायटेड टॅक्सीमेन असोसिएशनान मंत्री गुदिन्हो हांची तांचे कचेरेंत भेट घेवन आपल्यो समस्या आनी दुबाव तांचे मुखार मांडले. ह्या वेळार वास्काचे आमदार कृष्णा साळकार, चिखलीचे सरपंच कमलाप्रसाद यादव, उपसरपंच ऐश्वर्या कोरगांवकार हाजीर आशिल्ले.
मोपा विमानतळ थोड्याच दिसां भितर कार्यान्वीत जातलो. ताका लागून मोपाचे सर्तींत तिगून उरपा खातीर दाबोळी विमानतळार प्रवाशांक योग्य त्यो सुविधा मेळूंकच जाय. दाबोळी विमानतळार गोवा मायल्सचो कावंटर उक्तो करतले. गोवा मायल्साक लागून गोंय सरकाराक जीएसटीच्या रुपान सुमार तीन कोटी रुपयांचो महसूल मेळ्ळा अशें गुदिन्हो हांणी सांगलें.
हांव हळडुव्या काळ्या टॅक्सीकारांच्या फायद्या खातीर सांगतां, अॅपाक लागून कांय लुकसाण जावचें ना. तशेंच तुमच्यो ज्यो समस्या आसात त्यो हांव स्वता लक्ष घालून पयस करतलों अशें आस्वासन दिलें.
संघटणेचे आदले अध्यक्ष प्रसाद प्रभुगांवकार हांणी आमचो गोवा मायल्साक केन्नाच विरोध नाशिल्लो. फक्त तांचो आनी आमचो कावंटर शेजरा आसचो न्हय इतलीच मागणी आसा. तशेंच विमानतळा भायर उब्यो केल्ल्यो रेंट अ कार हांकां तशेंच कांय दलालांचेर कारवाय करपाची मागणी तांणी केली.
प्रभुगांवकार हांची मागणी मान्य करतना गुदिन्हो हांणी दोनूय कावंटर एकामेकाच्या शेजरा नासतले. तशेंच रेंट अ कार आनी दलालांचेर कारवाय करपाचें उतर तांणी दिलें. थंयच्या कावंटराची आनी हेर सुवेवस्थेची पळोवणी करपाचें आस्वासन दिलें. ते प्रमाण काल (बुधवारा) तांणी पळोवणी केली. ह्या वेळार तांचे बरोबर दाबोळी विमानतळाचे संचालक धनंजय राव, येरादारी खात्याचे संचालक राजन सातार्डेकार, कदंब म्हामंडळाचे वेवस्थापकी संचालक डेरीक परेरा नेटो, म्हावेवस्थापक संजय घाटे, संघटणेचे प्रसाद प्रभुगांवकार, संजय नायक आनी हेर हाजीर आशिल्ले.
दाबोळी विमानतळ सुरूच उरतलो हे खातीर आमचे यत्न आसात. ते खातीर प्रवाशांक सुविधा दिवप गरजेचें आसा. मोपा हांगा जर बर्यो सुविधा मेळटा आसत आनी दाबोळे जर सगलोच गोंदळ आसत जाल्यार फुडार कितें आसतलो. ताका लागून गोवा मायल्सचो कावंटर येतलोच. जर संघटणेच्या वांगड्यांक तातूंत वांटेकार जावपाचें आसत जाल्यार ते वांटेकार जावंक शकतात अशें गुदिन्हो हांणी म्हणलें.
मजगतीं, आमी गोवा मायल्सांत वांटेकार जावपा बदला आमी स्वताचो अॅपूच विकसीत करतले अशें प्रभुगांवकार हांणी सांगलें. तशेंच आमकां कावंटर क्रमांक 29, आनी कावंटर क्रमांक 26 वा 27 दिवपाची मागणी केल्ल्याचें प्रभुगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
