भारतान माळ जिखली

भांगरभूंय | प्रतिनिधी

चायनामॅन बॉलर कुलदीप यादवाच्या जबरदस्त प्रदर्शनाच्या नेटार येजमान भारतान तिसरे आनी निमाणे वन डे मॅचींत दक्षीण आफ्रिकेक 7 विकेटींनी हारोवन माळ 2-1 फरकान जिखली.

आफ्रिकेन दिल्ली 100 धांवड्यांची मोख भारतान 19वे ओव्हरींत फक्त 3 विकेटी वगडावन मेळयली. शुभमन गिलान 49 आनी श्रेयस अय्यरान नाबाद 28 धांवड्यो केल्यो. ते पयलीं कुलदीप यादवान चार ओव्हरींनी चार विकेटी घेतल्यो. ताका मोहम्मद सिराज, शाहबाज अहमद आनी वॉशिंग्टन सुंदर हांणी बरी साथ दितना दरेकी दोन विकेटी घेतल्यो. आफ्रिके वतीन क्लासेनान सगल्यांत चड 34 धांवड्यो केल्यो.

मोखीचो फाटलाव करपी भारताक मुखेली शिखर धवन आनी गिल हांणी सुरवात करून दिली. पूण, धवन 14 बॉलांनी 8 धांवड्यो करून बाद जालो. ते उपरांत गिलान डावाची सगलीं सुत्रां आपल्या हातांत घेतली आनी 10वे ओव्हरींत पंगडाचो अर्द शेंकडो पुर्ण केलो.

मजगतीं, धवन बाद जाल्या उपरांत मैदानांत देंवपी ईशान किशनान 18 बॉलांनी 10 धांवड्यो करून गिलाची साथ सोडली. किशन बाद जाल्या उपरांत श्रेयस अय्यरान आक्रमक बॅटींग करून धांवगती वाडयली. मजगतीं, शुभमन गिल लेगीत अर्द शेंकड्याच्या लागसार पाविल्लो. पूण, एक धांवडेची गरज आसतना एन्गिडीन ताका एलबीडब्ल्यू बाद केलो. अखेरेक श्रेयसान सको मारून मॅच सोंपयली.

ते पयलीं पावसाच्या सांवटा खाला सुरू जाल्ले मॅचींत धवनान टॉस जिखून पयलीं प्रतिस्पर्धी पंगडाक बॅटींग करपाचें आमंत्रण दिलें. ताचो हो निर्णय वॉशिंग्टन सुंदर आनी मोहम्मद सिराज हाणें क्विंटन डी कॉक (6) आनी जानेमान मलान (15) हांकां बाद करून योग्य थारायलो.

दोनूय ओपनर सवाय भितर बाद जाल्या उपरांत फाटले मॅचींतलो हिरो रिझा हॅण्ड्रिक्स आनी एडेन मार्करम हांणी सादूरतायेन बॅटींग करपाक सुरवात केली. पूण, सिराजान हॅण्ड्रिक्साक तीन धांवड्यांचेर बाद करून आफ्रिके तिसरो धपको दिलो.

सिराजान शॉर्ट बॉलाचो बरे तरे वापर करून पयलीं मलान आनी उपरांत हॅण्ड्रिक्साक बाद केलो. ते उपरांत शाहबाज अहमदान मार्करमाक (9) बाद करून आफ्रिकेक चवथी धपको दिलो.

आफ्रिकेची स्थिती 4 बाद 43 अशी जाल्ली. काळजीवाहू मुखेली डॅव्हीड मिलर मैदानांत देंवलो. पूण, ताका व्हड खेळी करपाक जमली ना. वॉशिंग्टन सुंदरान ताका 7 धांवड्यांचेर बोल्ड करून माळेंत नाबाद रावपाची परंपरा खंडीत केली.

आफ्रिकेचो अर्दो पंगड फक्त 66 धांवड्यांचेर तंबूंत परतून गेल्या उपरांत कुलदीप यादवान फेलुकवायोक 5 धांवड्यांचेर बाद करून आफ्रिकेक आनीक संकश्टांत घालो. ते उपरांत शाहबाज अहमदान हॅन्रिच क्लासेनाची 34 धांवड्यांची खेळी सोंपयली. तो बाद जाल्लो त्या वेळार आफ्रिकेची स्थिती 7 बाद 93 अशी जाल्ली.

ते उपरांत कुलदीपान फॉर्ट्युनाक एके धांवडेचेर बाद केलो. फुडल्याच बॉलाचेर एर्निच नॉर्त्जेक शुन्याचेर बाद केलो. कुलदीपाक हॅट्रिकेची संद आशिल्ली. पूण, एन्गिडीन बॉल आडावन कुलदीपाची हॅट्रिकेची संद चुकयली. पूण, फुडले ओव्हरींत कुलदीपान मार्को जेनसेक बाद करून आफ्रिकेची डाव 99चेर सोंपयलो.