भांगरभूंय | प्रतिनिधी
भांगरभूंय । प्रतिनिधी
पोरणें गोंयः आपलीं घरां वतान म्हणून पणजे- फोंडें राष्ट्रीय म्हामार्ग रुंदीकरणाक मळार- खोर्ली आनी भोमा हांगच्या लोकांनी विरोध केला. आमची घरां मोडून हो रस्तो बांदचे परस भाजपान विरोधात आसतना सूचोवणी केल्ली ते प्रमाण बायपास रस्तो बांदपाची तांची मागणी आसा. मंगळाराक तांणी पणजे वचून बांदकाम खात्याच्या कार्यालयांतल्या जमीन संपादन अधिकाऱ्याची भेट घेवपाचो यत्न केलो.
भाजपान विरोधांत आसतना ह्या रस्तो रुंदीकरणाक विरोध केल्लो हाची भोमा हांगच्या संजय नायक हांणी याद करून दिल्या. सर्गेस्त मनोहर पर्रीकार हांणी विरोधी पक्ष फुडारी आसतना बायपार रस्तो बांदपाचो पर्याय तेन्नाच्या सरकाराक दिल्लो. सत्तेर येतकूच भाजपा तांणी रस्त्यार विरोध केल्लो हें विसरल्यात असें तांणी सांगलें.
फ्लाय ओव्हर बांदून घरा मोडपाचो प्रश्न सुटावो करपाचो प्रस्ताव आसा. मात ताका लागून आमच्या पूर्वजांच्या घरांक धोको उप्रासतलो अशें थळाव्यांनी सांगलें. हाचे पयलीं दोन फावट रस्तो रुंदीकरण आडावपाक आमकां रस्त्यार येवचे पडल्लें. 2016 वर्सा बांदकाम खात्यान आमकां रुंदीकरणाचो प्रस्ताव रद्द केला अशें सांगिल्लें. आतां अकस्मात हें रुंदीकरण करपाचें थारायल्ल्यान आमकां परत रस्त्यार येवचें पडटलें अशें खोर्ली- मळार हांगच्या एडवीन डिसा हाणे सांगलें.
जमीन संपादन अधिकारी रस्तो रुंदीकरणाचो प्लॅन दाखोवपाक अनमतना म्हणून लोकांनी तिडक उक्तायल्या. बांदकाम खातें एक प्लॅन दाखयता जाल्यार राष्ट्रीय म्हामार्ग प्राधिकरणान दुसरो प्लॅन तयार केला अशी म्हायती तांणे दिली. कुंडयच्यान कदंब बायपार रस्त्याक जोडपी बायपास रस्तो तयार करचो अशी थळाव्या लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
