भांगरभूंय | प्रतिनिधी
भांगरभूंय । प्रतिनिधी
म्हापशेंः कांदोळी हांगा कळंगुटे पुलिसांनी केल्ले कारवायेंत आशिष कुमार झा (27) आनी राजन कुमार झा (24) ह्या सिरोही- राजस्थान हांगच्या दोग भावांक अटक केली. तांचे कडेन आशिल्लो 6 लाख 90 हजार रुपये मोलाचो चरस आनी गांजो पुलिसांनी जप्त केला. मंगळाराक सकाळीं 5 वरांचेर ही कारवाय केली.
कांदोळे हांगच्या बोसिओ हॉस्पिटला लागीं घुवळे वखदांचो विक्री वेव्हार जातलो अशी खबर पुलिसांक मेळिल्ली. दुबावित अॅक्टिवा स्कूटरी वयल्यान येतकूच पुलिसांनी तांकां धरले. झडटी घेतली तेन्ना आशिष कुमार हाचे कडेन 702 ग्राम चरस मेळ्ळो. ताचें मोल 5.60 लाख रुपया आसा. राजन कुमारा कडेन 1 लाख 30 हजार मोलाचो 1 किलो 342 गाम गांजो मेळ्ळो.
निरीक्षक दत्तगुरू सावंत हांच्या फुडारपणा खाला उपनिरीक्षक विराज नायक, किरम नायक, हवालदार विद्यानंद आमोणका, समीर गरड, गणपत तिळोजी आनी विजय नायक हांच्या पंगडान ही कारवाय केली.. आशिष कुमार झा हो एक फूड डिलिव्हरी कंपनीन डिलिव्हरी बॉय म्हणून काम करतालो. ताचो भाव ताच्या वांगडा रावतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
