भांगरभूंय | प्रतिनिधी
इंडियन सुपर लिगेंत (आयएसएल) घरच्या प्रेक्षकां मुखार पयलीच मॅच खेळटना एटीके मोहन बगानान पयल्या अर्दांत जबरदस्त प्रदर्शन केलें. पूण, दुसऱ्या अर्दांत चेन्नयीयन एपसीन उत्कृश्ट रितीन पुनरागमन केलें.
एटीके मोहन बगानाची आक्रमणाची धार बोथट करतना चेन्नयीयनान बरे तरेन रणनिती तयार केली आनी फाटीं पडून लेगीत अखेरेक जैत जोडलें.
27व्या मिनटाक मनवीर सिंगाच्या गोलाक चेन्नयीयनान 64व्या मिनटाक क्वामे कारिकारीन पॅनल्टींतल्यान प्रत्युत्तर दिलें. ते उपरांत 83व्या मिनटाक रहिम अलीन गोल करून चेन्नयीयनाक 2-1 अशा फरकान जैत जोडून दिलें. चेन्नयीयनान आयएसएलांत पयलेच खेपे एटीके मोहन बगानाक हारयलो.
एटीके मोहन बगानान स्टार खेळगडो लिस्टन कोलासोलाक सुरवातीक मैदानाचेर देंवंक नाशिल्ल्यान सगल्यांक अजापाचो धपको बसलो. पूण, ह्युगो बौमोस, दिमित्री पेट्राटोस, आशिक कुरुनियन आनी मनवीर सिंग हांणी ताची गैरहाजेरी जाणावंक दिवंक ना.
मोहन बगानान आक्रमण हीच रणनिती आपणावन दावे वटेच्यान गोल करपाचो सातत्यान यत्न केलो. चेन्नयीयन एफसीचो डिफॅन्स फळी अपेशी थारली. पूण दुसऱ्या अर्दांत चेन्नयीयनान जबरदस्त प्रदर्शन करून जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
