भांगरभूंय | प्रतिनिधी
भारत आनी दक्षीण आफ्रिका ह्या पंगडां मदीं आयज तिसरी आनी निमाणी वन डे मॅच जातली. सध्या माळेंत 1-1 अशी बरोबरी आशिल्ल्यान दोनूय पंगड आयची मॅच जिखून माळ बोल्सांत उडोवपाक इत्सूक आसतले.
भारतान पयली मॅच फक्त 9 धांवड्यांनी वगडायिल्ली, जाल्यार दुसरी मॅच 7 विकेटींनी जिखून माळेंत बरोबरी सादिल्ली. आयचे मॅचींत परतून एकदा भारतीय क्रिकेट मोग्यांक श्रेयस अय्यर आनी ईशान किशन हांच्या कडल्यान आकर्शक बॅटिंगेची आस्त आसतली.
भारताचो मुख्य पंगड संवसारीक टी-20 सर्तीची तयारी करपाक ऑस्ट्रेलियेंत गेला. ताका लागून दावखुरो बॅट्समन शिखर धवन पंगडाच्या फुडारपणा खाला भारताचो युवा पंगड दक्षीण आफ्रिकेच्या बळिश्ट पंगडाक आव्हान दिता.
दक्षीण आफ्रिकेचो पंगड ऑस्ट्रेलिये बगर भारतांतूच संवसारीक टी-20 सर्तीचो सराव करता.
फुडल्या वर्सा भारतांत संवसारीक वन डे क्रिकेट सर्त जावपाची आसा. हे फाटभुंयेर धवना खातीर ही वन डे माळे सामकी म्हत्वाची थारल्या. धवन सध्या फक्त वन डे क्रिकेटींतूच खेळटा, ताका लागून धांवड्यो करून ह्या प्रकारांत भारताच्या पंगडांतली आपली सुवात घटमूट करपाक शकता. पूण, माळेंत ताका म्हणपा सारकें प्रदर्शन करपाक जमूंक ना. ताचे खेरीत युवा बॅट्समन शुभमन गिलाक लेगीत धांवड्यो करपाक जमूंक ना. पयले मॅचींत सवाय भितर बाद जाल्या उपरांत दुसरे मॅचींत ताणें बरी सुरवात केल्ली पूण, ताका व्हड खेळी करपाक जमूंक ना.
भारताची मदली फळी घटमूट दिसता. हातूंत श्रेयस अय्यर, ईशान किशन आनी संजू सॅमसन आसा. अय्यर आनी सॅमसन हांच्या प्रदर्शनांत सातत्य दिसलां, जाल्यार ईशान किशन बऱ्या फॉर्मांत आसा. भारताच्या पंगडांतली आपली सुवात कायम राखपाक तिगांयचो यत्न आसतलो.
दुसरे वटेन आफ्रिकेक फुडल्या वर्सा जावपी संवसारीक सर्तीचे दिश्टीन ही माळ म्हत्वाची आसा. तो आयसीसी संवसारीक क्रिकेट सुपर लिगेंत कांय गूण आपल्या खात्यांत जोडपाक इत्सूक आसतलो. आफ्रिका सध्या रॅंकिंगेंत 11वे सुवातेर आसा आनी 50 ओव्हरींचे संवसारीक सर्तींत थेट प्रवेश मेळोवपाचे स्थितींत तो ना. मुखेली तेंबा बावुमा फॉर्मा खातीर झुजता. फक्त क्विंटन डी कॉक, एडेन मार्करम आनी डॅव्हीड मिलर हांणीच अजून मेरेन बरें प्रदर्शन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
