भांगरभूंय | प्रतिनिधी
भांगरभूंय । प्रतिनिधी
सांगेंः युनियनाच्या फुडाऱ्यांची बदली करपाचें फाटीं घेवन पांच दिसांत पगारवाड केली ना जाल्यार संपार वचपाची शिटकावणी शेळपें- सांगें हांगच्या वरूण ब्रुव्हरेजीस हे पेप्सी कोल्ड ड्रिक्स कंपनीच्या 60 कामगारांनी दिल्या. कंपन पगारवाड करना. ताचे फाटपुरवणे खातीर वावुरपी कामगार युनियनाच्या फुडाऱ्यांची गोंयच्यान राजस्थानांत बदली करपाक पळयता, अशें युनियनाचो कायदो सल्लागार अॅड अजय प्रभुगांवकार हांणी शेळप्यां हांगा घेतिल्ले पत्रकार परिशदेंत सांगलें. कंपनी अधिकाऱ्यांनी दादागिरी सुरू केल्यार कामगारांक आपलें शस्त्र हातां घेवचें पडटलें अशी शिटकावणी तांणी दिल्या.
कंपनीन वेवस्थापनान वेगवेगळीं कारणा सांगून फाटल्या तीन वर्सां सावन कामगारांक पगारवाड दिली ना. 2022-25 ह्या तीन वर्सांच्या कामगारांच्या मागण्यांचेर कामगार युनिनयना कडेन उलोवपाचें सोडून फुडाऱ्यांक राजस्थानांत बदली करपाची नोटीस धाडून कामगारांचेर चेंपण हाडून तांकां सताववपाक लागलां अशें प्रभुगांवकार हांणी सांगले.
कामगारांनी कामगार आयुक्त, उपआयुक्त, सांगेचो आमदार आनी समाज कल्याण मंत्री सुभाष फळदेसाय हांका निवेदना सादर केल्यांत, मात अजून तांणी कामगारांची बाजू आयकून घेतली ना. कामगारांक काम सोडून वचात अशें वेवस्थापन सांगता अशी म्हायती तांणी दिली. पगारवाडीचो निर्णय बेगोबेग घेतलो ना जाल्यार मडगांवच्या कामगार उपायुक्ताच्या कार्यालयाचेर मोर्चा व्हरपाची शिटकावणी कामगार युनियनान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
