भांगरभूंय | प्रतिनिधी
पणजीः खडेगांठ कोंकणी वावुरपी तशेंच यात्रीक ट्रॅव्हल्स मडगांवचे वेवस्थापक राजेंद्र नायक (66) सोमारा 10 ऑक्टोबराक अंतरले.
राजेंद्र नायक हे चवथ्या अखील भारतीय कोंकणी लेखक संमेलन 1984 सावन कोंकणी खातीर क्रियाशील आशिल्ले. फादर सिप्रियान पै हाचे कडल्यान हुबळी शिकतना तांकां कोंकणीची प्रेरणा मेळ्ळी. ते उपरांतची भोवतेक कोंकणीचीं सगळीं शिबिरां, संमेलनां, परिशदो, मेळाव्यांत ते वांटेकार जाल्यात. राजभास चळवळींतले ते एक क्रियाशील वावुरपी. तांकां कोंकणी भाशा मंडळाचो कोंकणी सेवा पुरस्कार फावो जाला. राजेंद्र नायक हे शणै गोंयबाब सेवा केंद्र सांवड्डें कुडचडे हे संस्थेचे संस्थापक वांगडी आनी आदले अध्यक्ष. तशेंच कोंकणी कला साहित्य केंद्राचेय ते वांगडी आशिल्ले. तांचो इश्ट परिवार खूब व्हड आसा.
कोंकणी भाशा मंडळाचीं आर्गां
कोंकणी कार्यकर्ते राजेंद्र नायक हांकां कोंकणी भाशा मंडळान आर्गां ओंपल्या.
राजेंद्र नायक हांचो कोंकणी चळवळी कडेन खूब लागींचो संबंद आशिल्लो. 1982 वर्सां सावन तांणी कोंकणी भाशे संदर्भांतल्या वेगवेगळ्या चळवळींनी वांटो घेतला. कोंकणी प्रजेचो आवाजा खाला विंगड विंगड आंदोलनांनी तांचो सहभाग आसतालो. चळवळीचो भाग म्हणून तांणी पणजे आझाद मैदानाचेर 24 वरां उपास केला, अशें मंडळान म्हणलां.
वेगवेगळ्या संस्थां वरवीं राजेंद्र नायक हांणी कोंकणी भाशेचे उदरगती खातीर योगदान दिलां. कोंकणी भाशा मंडळ गोंयच्या वावुरपी समितीचेर ते वावुरल्यात. गोवा युवा महोत्सवाच्या आयोजन समितींत तांचो सक्रीय वांटो आसलो. कुडचडेंचें कोंकणी कला साहित्य केंद्र, कुडचडेंचें शणै गोंयबाब सेवा केंद्र, ह्या संस्थांनी म्हत्वाच्या पदांचेर तांणी कामकाज सांबाळ्ळां. कोंकणी भाशा मंडळाचो 2013 वर्साचो कार्यकर्तो पुरस्कार तांकां फावो जाल्लो. ट्रॅवल एजन्सी खातीर काम करतनाच आपली मायभास कोंकणी खातीर ते निश्ठेन वावुरले. कोंकणीच्या ह्या खडेगांठ कार्यकर्त्याक कोंकणी भाशा मंडळ आर्गां ओंपतां अशें उजवाडायिल्ल्या पत्रकांत म्हणलां.
सांवड्डेंच्या शणै गोंयबाब सेवा केंद्राक दुख्ख
शणै गोंयबाब सेवा केंद्र, सांवड्डे कुडचडे हे संस्थेचे संस्थापक वांगडी आनी आदले अध्यक्ष राजेंद्र चिमणू नायक हांच्या अकल्पित मरणाचेर केंद्राच्या समस्त वांगड्यांनी दुख्ख उक्तायलां.
केंद्राचे भोव क्रियाशील वांगडी, खडेगांठ कोंकणी वावुरपी, आपल्या तन मन धनान कोंकणी भाशीचे उदरगती खातीर सदांकाळ धडपडी एक भोव मोलाचो कार्यकर्तो संस्थेन वगडायला, अशी भावना केंद्राचे अध्यक्ष मनोहर पांगो नायक हांणी उक्तायल्या.
विठ्ठल सावंत आवदियेकार, मोहनदास सावंत देसाय, मेघशाम प्रभू, दिनेश नायक, ज्ञानेश्वर पुंडलीक नायक, दीपक आवरोलकार, सदानंद खांडेकार हांणीय राजेंद्र नायक हांच्या मनमेकळ्या स्वभावाविशीं यादी जागोवन भावपूर्ण आर्गा ओंपलीं. आर्गां ओंपपाची एक भौशीक बसका आयतारा 16 ऑक्टोबराक सकाळीं 10 वरांचेर ओंकार इन हॉटेलांत जातली, अशेंय केंद्रान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
