भांगरभूंय | प्रतिनिधी
भवनाचो बुन्यादी फातर 14 एप्रिल 2023 मेरेन बसोवचो: कोरगांवकार
म्हापशें : डॉ. बाबासाहेब आंबेडकर भवना खातीर जमीन उपलब्ध करून दिल्ले खातीर बाबासायब आंबेडकर समिती गोंय फांट्या वतीन मुख्यमंत्री डॉ. प्रमोद सावंत आनी समाज कल्याण मंत्री सुभाष फळदेसाय हांचे उपकार मानले.
म्हापशें समितीच्या कार्यालयांत आयोजीत पत्रकार परिशदेंत कार्याध्यक्ष सखाराम कोरगांवकार हांचे वांगडा समितीचे हेर पदाधिकारी हजर आशिल्ले. सरकाराचे तशेंच आमदार प्रवीण आर्लेकार, जीत आरोलकार आनी मंत्री गोविंद गावडे हांचेय उपकार मानले. ह्या लोक प्रतिनिधींच्या यत्नांक लागून समितीची खूबश्या वर्सांची मागणी पुराय जाल्या, अशें कार्याध्यक्ष सखाराम कोरगांवकार हांणी सांगलें.
ह्या भवनाचो बुन्यादी फातर ता. 14 एप्रिल 2023 मेरेन बसोवचो. जाका लागून समितीचो सरकाराचेर आशिल्लो विश्वास आनीक घट्ट जातलो, अशी मागणी कोरगांवकार हांणी केली.
मदले सुवातेरूच आंबेडकर भवन जावचें अशी खूब वर्सां सावन आमची मागणी आशिल्ली. सरकारान आश्वासना प्रमाण जागो उपलब्ध करून दिला. हालींच जाल्ले बसकेंत भवना खातीर जागो निश्चीत जाला. भवन जावचें म्हणून केंद्रीय मंत्री रामदास आठवले हांणीय सहकार्य केलां. तांणी भवना खातीर निधी उपलब्ध करून दिवपाचें आश्वासनूय दिलां अशें कोरगांवकार हांणी म्हणलें.
गोंय वैजकी हॉस्पिटलांत पदवीत्तर शिक्षणा खातीर जागो राखीव दवरचो. तशेंच पद्वीच्या शिक्षणा खातीर आशिल्ल्या जाग्यांत वाड करची अशी मागणी मुख्यमंत्र्यांकडेन करले, अशें कोरगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
