भांगरभूंय | प्रतिनिधी
हाचे मुखार अर्थीक वर्स सुरू जातकूच 5 टक्के दरवाड जातली
भांगरभूंय I प्रतिनिधी
पणजी : उदकाच्या बिलांत सरकारान 5 टक्के दरवाड केल्ल्यान सरकाराक म्हयन्याक 60 लाखांची अतिरिक्त येणावळ मेळटली. वर्साक ही रक्कम 7 कोटी 20 लाख रुपया जाता. सध्या सरासरी 38 टक्के गिरायकांक शून्य बील येता. हाका लागून सरासरी 62 टक्के गिरायकांक उदका खातीर चड पयशे फारीक करचे पडटले.
सरकारान 1 ऑक्टोबर सावन उदकाच्या बिलांत 5 टक्के वाड केल्या. प्रधान मुखेल अभियंत्यांनी हे विशींची अधिसुचोवणी जारी केल्या. उदक दरवाड उणी आशिल्याचो सरकाराचो दावो आसलो तरी विरोधी पक्षांनी खर हाचेर टिका केल्या. उदक दरवाड फाटीं घेवची, अशी मागणी गोवा फॉरवर्डाच्या शिश्टमंडळान मुखेल अभियंत्यांची भेट घेवन केली. हे सरकार लोकांच्या हिता आड निर्णय घेता, अशी टिका काँग्रेसीन केल्या.
विरोधकांच्या आरोपांत कसलेच तथ्य ना, अशें सांगून भौशीक बांदकाम खात्याचे मंत्री निलेश काब्राल हांणी दरवाडीचें समर्थन केलां. हाचें फुडें अर्थीक वर्स सुरू जातकूच 5 टक्के दरवाड लागू जातली. सध्या 0 ते 15 हजार लिटर मेरेन साडे तीन रुपया दर आसा. 16 ते 24 हजार लिटर मेरेन 9 रुपया युनीट आसा. 26 ते 50 हजार लिटर मेरेन 15 रुपया युनीट जाल्यार 50 हजारां परस चड लिटरा खातीर 25 रुपया युनीट दर आसा. आतां ह्या सगल्या गटांत 5 टक्क्याची भर पडटली. हॉटेल, बार, रॅस्टोरंण्ट हांकां वेवसायीक दराची आकारणी जातली.
उदकाच्या बिलांत 5 टक्के दरवाडी उपरांत म्हयन्यांक 12 कोटी 60 लाखांची येणावळ येतली. दरवाडी उपरांत म्हयन्याक 60 लाखांची अतिरिक्त येणावळ जमा जातली, अशेंय तांणी सांगलें.
सध्या 16 हजार लिटर मेरेनचें उदक फुकट मेळटा. फाटल्या वर्सा सप्टेंबर सावन ही येवजण सरकारान सुरू केल्या. 16 हजारां परस चड लिटर उदकाचो वापर जाल्यार पुराय वापराचेर बिलाची आकारणी जाता. हाका लागून चड उदक वापरता तांकां थाकाय मेळना. उदकाचो वापर उणो करतात, तांकां थाकाय मेळटा. उदकाची बचत जावची, हो हे येवजणे फाटलो उद्देश आसा.
मुख्यमंत्री डॉ. प्रमोद सावंत हांच्या सरकारान काँग्रेसीचे आमदार खरेदी करपा खातीर बरोच खर्च केला. हो पयसो उदकाचे दरवाडींतल्यान वसूल करपाक सरकार सोदता अशी टिका आम आदमी पक्षान केल्या.
महात्मा गांधीजींच्या जल्मदिसाचे आदले दिसा जाल्ली दरवाड दुर्दैवी आसा. 18 मिणटांच्या सोपूतविधी सुवाळ्याचेर सरकारान 6 कोटी रुपया खर्च केलाे. सरकाराचे तिजोरेंत आतां खणखणाट आसा. पयसो एकठांय करपाक ही दरवाड आसा, अशी टिका युरी आलेमांव हांणी केल्या. भाजप सरकाराच्या काळांत म्हारगाय वाडत आसा. काँग्रेसीचे आमदार खरेदी करपाक भाजप सरकारान कोट्यांनी रुपया खर्च केला. हो पयसो वसूल करपाची प्रक्रिया आतां सुरू जाल्या अशी टिका गोवा फॉरवर्डाचे आमदार विजय सरदेसाय हांणी केल्ली.
सध्या 16 हजार लिटर मेरेन फुकट उदक मेळटा. सरकारान फाटल्या सप्टेंबर सावन फुकट उदक दिवपाची येवजण सुरू केल्या. राज्यात 3 लाख 13 हजार घरगुती गिरायकां आसात. सध्या 1 लाख 20 हजार गिरायकांक शून्य बील येता. हे प्रमाण 38 टक्के जाता. हाचो अर्थ 62 टक्के गिरायकांक 5 टक्के दरवाडीचो फटको बसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
