भांगरभूंय | प्रतिनिधी
भांगरभूंय । प्रतिनिधी
पणजीः दिवाडी हांगच्या वृद्धाश्रमांत रावपी जुवांव रिबेलो हाचो खून केल्ल्याचो आरोप आशिल्ल्या इलिसाय सिक्वेरा हांची फिर्यादी पक्ष पुरावे सादर करपाक शकलो ना देखून पणजेच्या उत्तर गोंय जिल्हो आनी सत्र न्यायाधीश छोलू गांवस हांणी निर्दोश सुटका केली.
खूनाची कागाळ वृद्धाश्रमाची प्रभारी मोनिका रॉड्रिग्ज हिणे पोरणे गोंयच्या पुलीस स्टेशनांत 14 ऑक्टोबर 2019 दिसा केल्ली. जुवांव रिबेलो आनी इलियास हाचें साद्या कारणा वयल्यान झगडें जााल्लें. सांजे 7 वरांचेर ते न्हिदपाक गेले मात थोड्या वेळार रिबेलो जखमी जाल्ल्याचें पळोवन ताका हॉस्पिटलांत दाखल केल्लें. 7 नोव्हेंबराक ताका उपचार सुरू आसतना मरण आयिल्ल्यान पोरणे गोंय पुलिसांनी इलियसा आड खूनाचो गुन्यांव नोंद केल्लो.
पोरणे गोंयचे तेन्नाचो पुलीस निरीक्षक कृष्णा सिनारी हांणी जिल्हो आनी सत्र न्यायालयांत आरोपपत्र सादर केल्लें. इलियास हाचो वकील वाय येलगर हांणी युक्तिवाद करतना खून जाल्ल्चाचें प्रत्यक्ष पळोवपी नाशिल्ल्यान तशेंच रिबेलो हाचे कुडीचेर केल्ल्या पोस्टमॉर्टेमांत रगताच्या संसर्गाक लागून (सेप्टिसिमिया) आनी शॉक बशिल्ल्यान ताका मरण आयलें अशें नमूद केल्ले अशें सांगलें. इलियास हाणे खून केल्ल्याचे पुरावे नाशिल्ल्यान न्यायालयान ताका निर्दोश थारायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
