भांगरभूंय | प्रतिनिधी
पेडणें: मांद्रें पंचायत वाठारांतल्या मेस्तवाड्या वयल्या गुणाजी च्यारी हांच्या घराचेर वीज पडून उण्यांत उणें तीन लाखांचें लुकसाण जालें.
ही घडणूक 29 सप्टेंबराक रातच्या 8.30 वरांच्या सुमाराक घडली. त्या वेळार पावस पडटालो. वीज घराचेर पडटाच लायटीचें शॉर्टसर्कीट जालें. ताका लागून उजो लागलो. ताका लागून घरांतलें सामान लासलें.
मांद्रेंचे आमदार जीत आरोलकार, पेडणें उपजिल्होधिकारी दीपक वायंगणकार, तलाठी आनी हेर अधिकाऱ्यांनी घराची पळोवणी केली. सरकार दरबारांतल्यान योग्य ती मजत दिवपाचो आपूण यत्न करतलों, तशेंच वैयक्तीक पांवड्यार लेगीत मजत करतलों, अशें ह्या वेळार आमदार आरोलकार हांणी सांगलें.
उपजिल्होधिकाऱ्यान हे घडणुकेचो ताकतिकेन पंचनामो करून लुकसाणेचो आंकडो घालून अहवाल सादर करपाक तलाठ्याक सांगलें. आपूण तो वरिश्ठांक धाडून बेगिनात बेगीन च्यारी कुटुंबाक मजत मेळोवन दिवपाचो यत्न करतलों, अशें उपजिल्होधिकाऱ्यान सांगलें. घराक उजो लागताकच शेजाऱ्यांनी उजो पालोवपाचो यत्न केलो. तशेंच उजो पालोवपी दळाचे जवानूय घडणुकेचे सुवातेचेर आयले. पूण घरा मेरेन बंब व्हरपाक वाट नाशिल्ल्यान ते परतून गेले. मात ते मेरेन शेजाऱ्यांनी घराक लागिल्लो उजो पावोवपाक येस मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
